Астанадағы «Нұрлы жол» вокзалының күту залындағы ауасыздыққа жолаушылар тарапынан түскен көптеген шағымнан кейін «Қазақстан темір жолы» (ҚТЖ) компаниясы мәселені мойындап, шұғыл шаралар қабылдады. Компанияның баспасөз қызметі вокзалда температуралық режим мен ауа баптау жүйесінің жұмысы тексеріліп, күту залдары мен техникалық бөлмелер қаралғанын хабарлады, деп хабарлайды infohub.kz.
Тексеру қорытындысы бойынша ылғалдандыру функциясы бар тағы 20 өндірістік желдеткіш орнату туралы шешім қабылданды. Вокзал кезекшілеріне температуралық режимді тәулік бойы бақылап, жолаушылардың өтініштеріне жедел ден қою тапсырылды. Сондай-ақ медицина қызметкерлерінің тәулік бойы кезекшілігі ұйымдастырылды.
ҚТЖ-да Астанада орнаған аномальды ыстық ауа райы жағдайында ауа баптау жүйесіне жүктеме айтарлықтай артқанын атап өтті. Қосымша жүктеме сонымен қатар Астана-1 вокзалын жаңғыртуға байланысты 16 жолаушылар пойызының уақытша «Нұрлы жол» вокзалына ауыстырылуымен байланысты. Нәтижесінде жолаушылар ағыны 23%-ға өсіп, бұл да салқындату жүйесіне жүктемені арттырды.
Компания жолаушылардан уақытша қолайсыздықтар үшін кешірім сұрап, түсіністік танытқандары үшін алғыс білдіреді. Бұған дейін Астанадағы «Нұрлы жол» вокзалында жолаушылардың ауасыздыққа шағымданғаны хабарланған болатын.