WhatsApp-та көптен күткен никнеймдер функциясы біртіндеп қолданушыларға енгізіле бастады. Енді телефон нөміріңізді жарияламай-ақ жаңа адамдармен сөйлесуге болады, деп хабарлайды infohub.kz сайты.
Кейбір қолданушылар бұрын резервтелген никнеймдерінің белсенді болғаны туралы хабарлама алды. Енді оны жаңа контактілермен сөйлескенде телефон нөмірінің орнына қолдануға болады. Функция біртіндеп таралып, әзірге барлығына қолжетімді емес.
Жаңарту сіздің аккаунтыңызға жеткенде, «Баптаулар» → «Аккаунт» → «Пайдаланушы аты» бөлімін ашып, әлі жасамаған болсаңыз, бірегей никнейм таңдау жеткілікті. Қаласаңыз, оны өзгертуге немесе мүлдем жоюға болады.
Ең басты жаңалық — енді жаңа әңгімелесушілерге сіздің телефон нөміріңізді білу міндетті емес. Функция қосылған болса, олар тек пайдаланушы атын көреді. Алайда нөмір WhatsApp-та тіркелу үшін әлі де міндетті болып қалады және контактілер тізіміндегі адамдарда сақталады.
WhatsApp-та жаңа жүйе ең алдымен құпиялылықты арттыру үшін жасалғанын атап өтеді. Қолданушылар жеке телефон нөмірін жарияламай-ақ таныса алады, топтық чаттарға қосыла алады және жаңа адамдармен хат алмаса алады. Сонымен қатар, адамды никнеймі бойынша кездейсоқ табу мүмкін емес — мессенджерде пайдаланушы атауларының ортақ каталогы жоқ, сондықтан сөйлесуді бастау үшін нақты никнеймді білу қажет.
Бұған дейін Kursiv LifeStyle WhatsApp топтық чаттарға үлкен жаңарту енгізгенін жазған болатын.