1 қазанға қарай Бірыңғай жинақтаушы зейнетақы қорында (БЖЗҚ) сақталған қаражаттың жалпы сомасы 28,3 трлн теңгеге жетті. Соңғы бір жылда бұл көрсеткіш 2,6 трлн теңгеге өсті. Оның едәуір бөлігі қазақстандықтардың жарнасынан емес, инвестициялық кіріс есебінен қалыптасқан, деп хабарлайды infohub.kz сайты.
Зейнетақы жинағы «өлі салмақ» болып жатпайды: ол пайда әкелетін түрлі қаржы құралдарына салынады. Мәселен, жыл басынан бері инвестициялық кіріс шамамен 882,28 млрд теңгені құрады.
Ұзақ мерзімді алсақ, сомалар одан да үлкен болып шығады. БЖЗҚ мәліметінше, зейнетақы активтері біріктірілген сәттен бастап, яғни 2014 жылдан 2026 жылдың 1 қазанына дейін жинақталған инвестициялық кіріс 14,3 трлн теңгеге жетті. Бұл азаматтардың жалпы жинағының шамамен 40%-ы.
Жинақтаушы зейнетақы жүйесі жұмыс істеген бүкіл кезеңде, 1998 жылдан 2026 жылдың 1 қазанына дейін жинақталған инвестициялық кірістілік 1 090,84%-ды құрады, ал сол уақытта инфляция 1 014,83%-ға жетті. Осылайша, қазақстандықтардың зейнетақы жинағы осы уақыт бойы өзінің сатып алу қабілетін сақтап келеді.
Инвестициялық кіріс зейнетақы активтерін қаржы құралдарына орналастыру есебінен қалыптасады. Оның мөлшеріне бағалы қағаздар мен басқа да құралдар бойынша сыйақы түсімі, олардың нарықтық құнының өзгеруі және валюта бағамының ауытқуы әсер етеді.
Сонымен қатар 7 қыркүйектен бастап қазақстандықтар барлық зейнетақы жинағын жеке инвестициялық портфельді басқарушыларға (ЖИПБ) аудару мүмкіндігіне ие болды. Көптеген азамат бұл мүмкіндікті пайдаланып үлгерді. Бұл азаматтардың жинағы үшін басқарушы компанияны өз бетінше таңдап, болашақ зейнетақысының мөлшеріне ықпал еткісі келетіндердің көбейгенін көрсетуі мүмкін.