Qazaqstanda myńdaǵan bala jaqyn arada bilim depozıtterine memlekettik qoldaý alady. infohub.kz saıtynyń habarlaýynsha, elimizde 15 myń bala jaqyn kúnderi AQYL bilim depozıtterine 3,9 mlrd teńge alady. Bul týraly Otbasy bankinde málimdedi.
«Keleshek» baǵdarlamasy aıasynda memleket bes jastan bastap balalarǵa AQYL depozıtterine bastapqy bilim kapıtalyn esepteıdi. Baǵdarlama iske qosylǵannan beri Otbasy banki arqyly mundaı memlekettik qoldaýdy 35 myń bala aldy. Jalpy aýdarylǵan soma 8,2 mlrd teńgeni qurady.
Bankte atap ótkendeı, jaqyn kúnderi 2026 jyldyń birinshi jartyjyldyǵynda bes jasqa tolǵan taǵy 15 myń bala depozıtterine 3,9 mlrd teńge alady. Ekinshi jartyjyldyqta bes jasqa tolatyndarǵa tólemder 2027 jyldyń aqpan aıynda jasalady. Jalpy 2026 jyldyń qorytyndysy boıynsha 7,5 mlrd teńge kólemindegi bilim kapıtalyn 30 myńǵa jýyq bala alady.
«Keleshek» baǵdarlamasy aıasynda tamyz aıynda memleket balanyń shotyna 260 myń teńge esepteıdi. Bul qarajatty alý jáne saqtaý úshin ata-analar AQYL depozıtin ashyp, bala kámeletke tolǵanǵa deıin únemi jarna salyp turýy kerek. Jyldyq eń tómengi jarna 24 AEK, ıaǵnı 2026 jyly 103,8 myń teńgeni quraıdy. Áleýmettik osal sanattaǵy balalar úshin – 12 AEK, ıaǵnı 51,9 myń teńge.
Sonymen qatar depozıtke Otbasy bankinen – JESN 14,75%-dan, al memleketten – 5% syıaqy esepteledi.
18 jasta bilim depozıtindegi jınaqqa balanyń «Ulttyq qor – balalarǵa» baǵdarlamasy boıynsha alǵan qarajatyn qosyp, ýnıversıtetke túsýge paıdalanýǵa bolady. Ol ýaqytta shotta birneshe mıllıon teńge jınalýy múmkin.
Buǵan deıin Alatau City Bank (burynǵy Jusan Bank) Aqyl bilim jınaq depozıti boıynsha mólsherlemelerdi birden 1,5 p.t. kótergeni habarlanǵan bolatyn.