Astanada Bolashaq Oıyndary-2026 aıasynda PUBG: Battlegrounds tártibinde chempıon anyqtaldy. Jeńisti 131 upaı jınaǵan qytaılyq 17 Gaming komandasy jeńip aldy, dep habarlaıdy infohub.kz saıty.
Qazaqstan astanasynda ótip jatqan GOTF 2026 týrnırinde osy tártip boıynsha álemniń 16 úzdik komandasy 15 mach ótkizdi. Tartysty báseke qorytyndysy boıynsha 2018 jyly qurylǵan 17 Gaming komandasy birinshi orynǵa ıe boldy. Ekinshi oryndy vetnamdyq GAM The Expendables (120 upaı) ıelense, úshtikti 2013 jyldan beri kıberarenalarda óner kórsetip kele jatqan fransýzdyq Team Vitality (106 upaı) túıindedi.
Týrnırdegi kúres óte shıelenisti boldy: chempıon tek sońǵy kartada anyqtaldy, al kóshbasshylar úsh oıyn kúni boıy aýysyp otyrdy. Jeńimpaz 300 myń dollar júlde qoryn ıelense, kúmis júldeger 120 myń, qola júldeger 100 myń dollar aldy. Mundaı deńgeıdegi týrnırlerde tuńǵysh ret óner kórsetken qazaqstandyq DIGA Esports komandasy 59 upaı jınap, 14-orynǵa turaqtap, 15 myń dollar utyp aldy.
DIGA Esports komandasynyń atleti Sanjar Qalıev áserimen bólisti: «Bizden bólek, týrnırge álemniń 15 úzdik komandasy qatysty, sondyqtan oınaý óte qıyn boldy. Biraq biz jaqsy nátıje kórsettik dep oılaımyn, ári mundaı týrnırge qatysý biz úshin úlken mártebe boldy. Jankúıerlerdiń qoldaýyn estip, kórip turdyq, bul shynymen júregimizge jylýlyq uıalatty. Birinshi kún biz úshin beıimdelý kezeńi boldy, ekinshi kúni oınaý ońaıyraq boldy, al úshinshi kún jaqsy ótti dep sanaımyn. Bizdiń komandada buryn iri eýropalyq jarystarǵa da qatyspaǵan oıynshylar bar, al munda bizge qarsy álem chempıondary oınady. Sondyqtan mundaı deńgeıdegi komandalar arasynda 14-oryn — onsha jaman nátıje emes».
Qazaqstandyq komanda úshin jarqyn sátterdiń biri — týrnırdiń segizinshi machyndaǵy jeńis boldy, ony astanalyq Beeline Arena trıbýnasyndaǵy kórermender qoshemetpen qarsy aldy. Eske salaıyq, Bolashaq Oıyndary 2026 Astanada 29 shildede bastalyp, 9 tamyzda aıaqtalady. Baǵdarlama segiz tártipti qamtıdy, jalpy júlde qory 4,65 mıllıon dollardy quraıdy. Uıymdastyrýshy — «Qazsportınvest» AQ, Qazaqstan Respýblıkasy Týrızm jáne sport mınıstrligi men Astana ákimdiginiń qoldaýymen. Alatau City Bank usynǵan Battle Royale – PUBG: BATTLEGROUNDS jarystary aıaqtalǵannan keıin týrnır qalǵan tártipter boıynsha jalǵasýda.
Phygital Basketball fınaldyq machtary dúısenbi, 3 tamyzda ótedi, al Bank CenterCredit usynǵan MOBA PC Dota 2 jarystary 5 tamyzǵa deıin sozylady. 4 tamyzdan bastap Phygital Football UFL, Phygital Shooter CS 2 jáne MOBA Mobile MLBB týrnırleri bastalady. Phygital Dancing jarystary 6-7 tamyzda, al Phygital Fighting 8 tamyzda ótedi.