Qazaqstanda jalǵan dıplomdarǵa qarsy belsendi kúres júrgizilýde: búgingi tańda 46 jalǵan qujat pen olardy zańsyz daıyndaýmen aınalysqan 20 ınternet-resýrs anyqtaldy, dep habarlaıdy infohub.kz saıty.
Ǵylym jáne joǵary bilim mınıstrliginiń málimetinshe, sońǵy ýaqytta jelide jalǵan dıplomdar týraly aqparat jıi kezdesedi. Qujattardyń túpnusqalyǵyn tekserý úshin vedomstvo 1991 jyldan beri berilgen dıplomdardyń derekqoryn qurdy.
Mınıstrlikte túsindirgendeı, dıplomdar arnaıy modýl arqyly biregeı nómirler men QR-kodtar berile otyryp jasalady. Júıege tek osy modýlde tirkelgen joǵary oqý oryndarynyń resmı jaýapty qyzmetkerleri ǵana qol jetkize alady. Dıplomdar «Biryńǵaı joǵary bilim berý platformasy» (EPVO) aqparattyq júıesindegi bilim alýshylar týraly derekter negizinde jasalady. Eger bilim alýshy týraly málimet EPVO-da bolmasa, dıplom nómirin qalyptastyrý múmkin emes.
Óz úlgisindegi, biraq jasalǵan biregeı nómiri men QR-kody joq bilim qujattary jaramsyz dep sanalatyny atap ótildi. «Sonymen qatar, joǵary oqý oryndary derekterdi sıfrlandyrýdy jalǵastyrýda, al jumys berýshiler dıplomnyń túpnusqalyǵyn arnaıy servıs arqyly teksere alady: https://epvo.kz. Dıplomnyń elektrondyq nusqasy elektrondyq úkimet qosymshasynda da qoljetimdi („Sıfrlyq qujattar“)», — dep qosty mınıstrlik.
Sonymen qatar, Qazaqstanda jalǵan bilim qujattaryn jasaý jáne satý faktilerine turaqty monıtorıń júrgizilip, joly kesilýde. Anyqtalǵan jaǵdaılar boıynsha materıaldar İİM men Mádenıet jáne aqparat mınıstrligine jiberildi.
QR Qylmystyq kodeksiniń 385-babyna sáıkes, jalǵan qujattardy jasaý nemese paıdalaný aıyppul salýǵa, túzeý jumystaryna nemese 2 jylǵa deıin bas bostandyǵyn shekteýge ne bas bostandyǵynan aıyrýǵa ákep soǵady.