Almaty qalasy Bilim basqarmasy az qamtylǵan otbasylarǵa balalardy mektepke daıyndaýǵa beriletin kómek kólemine túsinikteme berdi. Bıyl kómek kólemi 60 myń teńgeni quraıdy, dep habarlaıdy infohub.kz saıty.
Almaty qalasy Bilim basqarmasynyń basshysy Sáken Aralbaev RSK-da ótken brıfıńte mektep maýsymyna qarjylaı kómek kórsetýge Almatyda 460 mln teńge bólingenin aıtty. Kómek 7669 jetim balany, az qamtylǵan otbasylar men AÁK alatyn otbasylardyń balalaryn qamtıdy.
«Bıyl Almatyda tólem mólsheri bir balaǵa 60 myń teńgeni quraıdy. Ata-analar nysan men keńse taýarlaryn ózderi tańdaı alýy úshin qarajat tikeleı ata-analardyń karta shottaryna aýdarylady», — dep atap ótti basqarma basshysy.
Ol sondaı-aq bul somanyń oqýshyny jınaýǵa jetkilikti ekenin aıtty. «Biz kostúmdi, sporttyq kostúmdi, rúkzakty, keńse taýarlaryn jáne t.b. eseptedik. Meniń oıymsha, 60 myń teńge oqýshyny jańa oqý jylyna daıyndaýǵa jetedi. Eger az qamtylǵan otbasylarǵa jatatyn ata-analar tarapynan qosymsha qajettilikter týyndasa, biz aýdandyq ákimdiktermen birlesip, «Mektepke jol» aksıasy aıasynda qosymsha kómek kórsetýge daıynbyz», — dedi Sáken Aralbaev.
Sonymen qatar, spıkerdiń aıtýynsha, respýblıkalyq «Mektepke jol» qaıyrymdylyq aksıasy aıasynda aýdandyq ákimdikterdiń demeýshilik qarajaty esebinen 8660 balany qajetti mektep kerek-jaraqtarymen qamtamasyz etý josparlanýda.
Aǵymdaǵy jyldyń 17 tamyzyna deıin aýdandyq ákimdikter arqyly az qamtylǵan otbasylardan shyqqan 3968 oqýshyǵa 98 mln teńge somasynda qaıyrymdylyq kómek kórsetildi.