Abaı oblysynda qytaı kapıtalynyń qatysýymen eki iri ónerkásip nysany boı kóteredi: oblys ákimi Inner Mongolia Wanjiang Investment jáne Xinjiang Sanbao Industrial Group kompanıalarymen elektrolıttik alúmını zaýyty men jońqaly plıta (DSP) óndiretin zaýyt salý týraly kelisimge qol qoıdy. Eki jobaǵa salynatyn ınvestısıanyń jalpy kólemi 1,5 mlrd dollarǵa baǵalanyp otyr, dep habarlaıdy infohub.kz saıty.
Qujattar «Qazaqstan – Qytaı» ınvestısıalyq forýmy aıasynda qol qoıyldy. Eki jobanyń ishindegi eń aýqymlysy – jylyna 300 myń tonna elektrolıttik alúmını shyǵaratyn zaýyt qurylysy. Kásiporyndy energıamen qamtamasyz etý úshin qýaty 1 GVt jel elektr stansıasyn salý kózdelgen.
1,5 mlrd dollarlyq jalpy ınvestısıanyń 1 mlrd dollary alúmını zaýytyna jumsalady. Joba elektrolız sehyn, anodtardy jınaý jáne usaqtaý sehtaryn, sondaı-aq qosalqy ınfraqurylymdy salýdy qamtıdy. Kásiporynda 630 kA elektrolızerler men elektrolıttiń energıa únemdeıtin tehnologıasy qoldanylady.
Zaýyt qurylysyn 2027 jyldyń naýryzynda bastaý, 2028 jyldyń jeltoqsanynda aıaqtaý josparlanyp otyr. Joba metaldy odan ári óńdeýge negiz qalaıdy, sondaı-aq jańa jumys oryndaryn, salyq túsimderin jáne sabaqtas salalardyń qyzmetteri men ónimderine suranysty qamtamasyz etedi.
Ekinshi joba – jylyna 2 mln paraq jońqaly plıta (DSP) óndiretin zaýyt. Bul óndiriske salynatyn ınvestısıa kólemi 172 mln dollarǵa baǵalanyp, qarjylandyrý ınvestorlardyń óz qarajaty esebinen júzege asyrylady.
Kásiporyn jylyna 300 myń tekshe metrge deıin aǵashty óńdeıdi. Bul – órtengen jáne sapasyz aǵashty, jel qulatqan aǵashtardy jáne orman órtinen zardap shekken aýmaqtardaǵy basqa da aǵash qaldyqtaryn óńdeý. Joba úshin saý aǵashtar kesilmeıdi.
Zaýyt ónimi Qazaqstan naryǵyna jáne Ortalyq Azıa elderine eksportqa baǵyttalǵan. Jobany iske asyrý merzimi – 2027–2028 jyldar. Kásiporyn iske qosylǵan soń 120 turaqty jumys orny ashylady, qurylys kezeńinde 80 ýaqytsha jumys orny qurylady.
Inner Mongolia Wanjiang Investment Group kómir óndirý jáne tasymaldaý, energetıka, jabdyq óndirý jáne qurylys salalarynda jumys isteıdi. Kompanıanyń jyldyq túsimi 5 mlrd ıýánnan asady, top quramyna 30-dan astam enshiles jáne baqylanatyn kompanıa kiredi.
Xinjiang Sanbao Industrial Group Ortalyq Azıada 30 jyldan astam jumys istep, Qazaqstanda turaqty ókildigi bar. Top kompanıalarynyń jıyntyq syrtqy saýda aınalymy 12 mlrd dollardan asady. Óńirde ol jobalaý, satyp alý, qurylys jáne transshekaralyq jetkizýdi uıymdastyrýdy qamtıtyn EPC modeli boıynsha 50-den astam iri jobany iske asyrdy.
Buǵan deıin ERG 2029 jylǵa deıin shamamen 1 mlrd dollarǵa tolyq sıkldi alúmını zaýytyn salatyny habarlanǵan bolatyn.