Abaı oblysynda mamandandyrylǵan aýdanaralyq ekonomıkalyq sot Máskeý oblysynyń Tórelik sotynyń sheshimin tanyp, oryndaýǵa jiberdi. Sheshim boıynsha jaýapkershiligi shekteýli seriktestikten 47 myń eýro, teńgege shaqqanda 25 mln teńge óndirildi, dep habarlaıdy infohub.kz saıty.
Abaı oblysy sottarynyń resmı Telegram-arnasynda habarlanǵandaı, mamandandyrylǵan aýdanaralyq ekonomıkalyq sotta Máskeý oblysynyń Tórelik soty sheshimin Qazaqstan Respýblıkasynyń aýmaǵynda taný jáne oryndaýǵa jiberý týraly ótinish qaraldy.
İs materıaldaryna sáıkes, jaýapkershiligi shekteýli seriktestik sotqa sheteldik tórelik sottyń jaýapkershiligi shekteýli seriktestikten 47 myń eýro, sondaı-aq memlekettik baj salyǵyn óteý shyǵyndaryn óndirý týraly sheshimin májbúrlep oryndaý jóninde ótinish bergen.
Máskeý oblysynyń Tórelik sotynyń sheshimi zańdy kúshine engen, alaıda boryshker ony erikti túrde oryndamaǵan.
Óndirip alýshynyń ókili ótinishti qanaǵattandyrýdy surap, boryshkerdiń Tórelik sotta isti qaraý týraly tıisti túrde habardar etilgenin, al shyǵarylǵan sheshimniń zańdy kúshine engenin kórsetti.
Jaýapkershiligi shekteýli seriktestik ókili óz ustanymyn negizdeý úshin isti qaraý ýaqyty men orny týraly tıisti habarlamany, sondaı-aq sheshim kóshirmesindegi anyq emes bedertańbany jáne sheshimniń zańdy kúshine enýi týraly jeke anyqtamanyń joqtyǵyn kórsetti.
Sot sheshim shyǵarý barysynda óndirip alýshynyń qajetti qujattardy usynǵanyn eskerdi: tıisti túrde kýálandyrylǵan sheshim kóshirmesi, zańdy kúshine enýi týraly qujat, ekinshi taraptyń prosesten habardar etilgenin dáleldeıtin qujattar jáne oryndaý qujaty.
Ótinishti qaraý kezinde sot Azamattyq prosestik kodekstiń 501–503-baptarynyń erejelerin basshylyqqa aldy. Bul baptar sheteldik sottardyń, sheteldik tórelikterdiń sheshimderin taný, oryndaýǵa jiberý jáne májbúrlep oryndaýdy retteıdi.
Qazaqstan Respýblıkasynyń aýmaǵynda sot aktisi ulttyq valútamen oryndalatyndyqtan, sheteldik tórelik óndirip alǵan somalar ótinish qaralǵan kúngi Qazaqstan Respýblıkasy Ulttyq Bankiniń baǵamy boıynsha teńgege qaıta esepteldi. Osylaısha, bereshek somasy 25 mln teńgeni qurady.
Sot túsindirgendeı, óndirip alýshy Qazaqstan Respýblıkasynyń sotyna júgingen kezde atqarý paraǵyn jazý úshin tólegen memlekettik baj sheteldik tórelik sheshimin taný jáne oryndaý rásimin bastaýǵa baılanysty shyǵys bolyp tabylady jáne sheteldik tóreliktiń ózi óndirip bergen somalardyń quramyna kirmeıdi. Osyǵan baılanysty sot bul somany jaýapkerden óndirýden bas tartty.
Mamandandyrylǵan aýdanaralyq ekonomıkalyq sot Qazaqstan Respýblıkasynyń aýmaǵynda Máskeý oblysynyń Tórelik sotynyń jaýapkershiligi shekteýli seriktestikten 25 mln teńge, sondaı-aq 890 myń teńge mólsherinde memlekettik baj salyǵyn óteý shyǵyndaryn óndirý týraly sheshimin tanyp, oryndaýǵa jiberdi.
Abaı oblysynyń soty birinshi satydaǵy sottyń uıǵarymyn ózgerissiz, jeke shaǵymdy qanaǵattandyrýsyz qaldyrdy.
Apelásıalyq saty 1992 jylǵy 20 naýryzda Táýelsiz Memleketter Dostastyǵyna qatysýshy memleketter úshin jasalǵan Sharýashylyq qyzmetti júzege asyrýǵa baılanysty daýlardy sheshý tártibi týraly kelisimge sáıkes, zańdy kúshine engen quzyretti sottardyń sheshimderi ózara tanylyp, oryndalatynyn túsindirdi.
Apelásıalyq saty sheteldik tórelik sheshimderdi taný jáne oryndaýǵa jiberý týraly ótinishterdi qaraý kezinde sot daýdy máni boıynsha qaramaıtynyn jáne talaptardyń negizdiligin anyqtamaıtynyn atap ótti. Sottyń mindeti – tıisti sheshimdi taný jáne oryndaýǵa jiberý úshin zańda kózdelgen negizderdiń bar-joǵyn tekserý.