Aımaq basshysy quttyqtaý sózinde bul jobanyń óńirdiń ónerkásiptik, ınvestısıalyq áleýetin arttyrýǵa, jańa jumys oryndaryn ashýǵa zor úles qosatynyn atap ótti.
«Memleket basshysy Qasym-Jomart Kemeluly Toqaev ınvestısıa tartýdy elimizdiń ekonomıkalyq saıasatynyń basym baǵyttarynyń biri retinde únemi aıtyp, tıisti tapsyrma berip keledi. Abaı oblysynda ınvestorlar úshin qolaıly jaǵdaı jasaýǵa, óndiristik ınfraqurylymdy damytýǵa jáne jańa óndiristerdi iske qosýǵa erekshe kóńil bólip otyrmyz. Búgingi joba – halyqaralyq seriktestiktiń naqty nátıjesi. Byltyr Qytaı Halyq Respýblıkasynda ótken «Úlken Altaı» halyqaralyq konferensıasynda bastalǵan kelissózderdiń nátıjesinde bul bastama júzege asyrylǵaly otyr. Joba óńirlik úılestirý keńesinde qoldaý taýyp, ony iske asyrý úshin qajetti memlekettik qoldaý sharalary kórsetilip, jer ýchaskeleri berildi. Jobanyń iske asyrylýy óńirdiń ónerkásiptik jáne ekologıalyq damýyna eleýli úles qosyp, jańa jumys oryndaryn ashýǵa, zamanaýı tehnologıalardy engizýge jáne aǵash shıkizatyn tıimdi, keshendi ári qaldyqsyz paıdalanýǵa múmkindik beredi», – dedi Berik Ýálı.
Joba órtten zardap shekken jáne sanıtarlyq kesýge jatatyn aǵashty tıimdi óńdeýge, qosylǵan quny joǵary ónim shyǵarýǵa, óndiris qaldyqtaryn qaıta paıdalanýǵa jáne óńirdiń ónerkásiptik áleýetin arttyrýǵa baǵyttalǵan.
Jobanyń jalpy ınvestısıalyq kólemi 67 mıllıon AQSh dollaryn quraıdy. Onyń aıasynda Semeı qalasynda 50 gektar aýmaqta tolyq sıkldi ındýstrıalyq-ekologıalyq aǵash óńdeý parki, al Borodýlıha aýdanyndaǵy Mıhaılovka aýylynda 4 gektar jerde aǵashty bastapqy óńdeý kesheni salynady.
Semeıdegi keshende jylyna 2 mıllıon tekshe metrge deıin aǵash shıkizatyn óńdep, 800–900 myń tekshe metr daıyn ónim shyǵarý josparlanǵan. Keshen quramyna jylyna 250–300 myń tekshe metr qýattylyqqa ıe E1, E0 jáne ENF klasyndaǵy taqtalar óndiretin zaýyt, jylyna 250–300 myń tekshe metr qýattylyqqa ıe OSB jáne FOSB taqtalaryn óndiretin zaýyt, jylyna 100 myń tekshe metrge deıin daıyn ónim shyǵaratyn jıhaz óndirisi modýli, termıalyq modıfıkasıalanǵan jáne antıseptıkalyq óńdeýden ótken aǵash óndirisi, eýropalletter óndirisi, aǵash pelletteri men bıootyn óndiretin zaýyt, organıkalyq tyńaıtqyshtar óndiretin zaýyt, qurylys-logıstıkalyq ortalyq jáne qajetti ınjenerlik ınfraqurylym enedi. Borodýlıha aýdanyndaǵy keshende jylyna 500 myń tekshe metrge deıin aǵash óńdeý jáne 120–150 myń tonna pellet óndirý kózdelgen. Atalǵan alańda aǵashty qabyldaý, esepke alý jáne suryptaý, qabyǵyn arshý, sortımentterge bólý, aralaý, keptirý, usaqtaý jáne shıkizatty tereń óńdeýge daıyndaý jumysy júrgiziledi. Daıyndalǵan aǵash Semeı qalasyndaǵy negizgi óndiristik keshenge jiberiledi.
Joba aıasynda zamanaýı avtomattandyrylǵan óndiris iske qosylyp, aǵash shıkizaty qaldyqsyz tehnologıa boıynsha tereń óńdeledi. Kásiporyndarda OSB jáne FOSB panelderi, MDF, aǵash-jańqaly taqtalar, fanera, shpon, ınjenerlik jáne árleý panelderi, jıhaz daıyndamalary, aǵash pelletteri, bıootyn jáne organıkalyq tyńaıtqyshtar óndiriletin bolady.
Tolyq qýatyna shyqqan kezde kásiporyndarda 900-ge deıin turaqty jumys orny ashylyp, óndirilgen ónim Qazaqstan naryǵymen qatar Ortalyq Azıa, Eýropa, Japonıa, Ońtústik Koreıa jáne ózge de halyqaralyq naryqtarǵa eksporttalady.
Investorlardyń aıtýynsha, jumysshylardyń 90 paıyzy jergilikti azamattardan quralady.
Kásiporynnyń aımaq ekonomıkasy úshin mańyzyna toqtalǵan «Xinjiang Chunzheng Aosi Trading Co., Ltd.» kompanıasynyń bas dırektory Chjan Lıkaı ındýstrıalyq-ekologıalyq park quramyna zamanaýı óndiris oryndary biriktiriletinin aıtyp, bul bastama aǵash óńdeý salasyn jańa deńgeıge kóteretinin jetkizdi.
"Bizdiń joba orman aýmaqtaryn sanıtarlyq tazartýdy, aǵashty bastapqy jáne tereń óńdeýdi, daıyn ónim, bıootyn jáne organıkalyq tyńaıtqyshtar óndirýdi biriktiredi. Jobanyń negizgi qaǵıdaty — aǵash shıkizatynyń árbir bóligin barynsha tıimdi paıdalaný jáne óndiristik qaldyqtardyń kólemin mınımýmǵa deıin azaıtý.
Bul joba órtten zardap shekken orman ýchaskelerin sanıtarlyq tazartý jumystaryn jedeldetýge, óńirde zamanaýı óńdeý ónerkásibin qalyptastyrýǵa jáne Qazaqstan men Qytaı arasyndaǵy uzaq merzimdi ári ózara tıimdi yntymaqtastyqtyń úlgisine aınalatynyna senimdimiz", – dedi Chjan Lıkaı.
Kásiporyn 2028 jyly paıdalanýǵa beriledi dep josparlanyp otyr. Onyń iske asyrylýy óńirde aǵash óńdeý ónerkásibin damytýǵa, tabıǵı resýrstardy tıimdi paıdalanýǵa jáne joǵary qosylǵan quny bar eksportqa baǵdarlanǵan ónim óndirýge múmkindik beredi.
Aıta keteıik, bıyl oblysta jalpy quny 131,2 mlrd teńge bolatyn 41 ınvestısıalyq jobany iske asyrý josparlanǵan. Sonyń nátıjesinde 3263 jańa jumys orny ashylady. Al jyl basynan beri 34,62 mlrd teńge bolatyn 14 ınvestısıalyq joba paıdalanýǵa berilip, 598 adam turaqty jumyspen qamtyldy.
ABAI OBLYSY ÁKİMİNİŃ BASPASÓZ QYZMETİ