Abaı oblysynda «Úshbıik», «Jarma» jáne «Shar» stansıalaryndaǵy temirjol vokzaldary keń aýqymdy jańǵyrtýdan keıin qaıta ashyldy. Saltanatty sharaǵa oblys ákimi Berik Ýálı qatysty, dep habarlaıdy infohub.kz.
Jumystar Prezıdent Qasym-Jomart Toqaevtyń tapsyrmasy men «Qazaqstan temir joly» UK» AQ-nyń vokzal ınfraqurylymyn jańǵyrtý baǵdarlamasy aıasynda júrgizildi. Jalpy el boıynsha 124 vokzal jańartylady, onyń 10-y — Abaı oblysynda.
«Temir jol — eldi mekenderdi baılanystyratyn strategıalyq mańyzy bar kólik júıeleriniń biri. Sondyqtan onyń ınfraqurylymyn jańartý jáne jolaýshylarǵa qolaıly jaǵdaı jasaý — ýaqyt talabynan týyndap otyrǵan mańyzdy mindet. Mańyzdy kólik joldarynyń toǵysqan jerinde ornalasqan Jarma aýdanynda biz birden úsh jańa vokzaldy ashyp otyrmyz. Olar jolaýshylarǵa qolaıly jaǵdaı jasap, Jarma aýdanynyń odan ári damýyna septigin tıgizsin», — dedi Ýálı.
Úsh stansıa da aımaqtyń kólik júıesinde mańyzdy ról atqarady. Olar arqyly «Semeı — Astana», «Novosıbırsk — Almaty», «Pavlodar — Almaty», «Semeı — Qyzylorda» jáne «Óskemen — Almaty» baǵyttary boıynsha jolaýshylar poıyzdary júredi.
1982 jyly salynǵan Shar qalasyndaǵy vokzal jańǵyrtýdan keıin aýdanyn 413 sharshy metrden 654 sharshy metrge deıin ulǵaıtty. Bir qabatty ǵımarat eki qabatty boldy, ishki bólmeler tolyq jańartyldy, lıft ornatyldy, kútý jáne qyzmet kórsetý aımaqtary zamanaýı jabdyqtarmen jaraqtandyryldy. Sondaı-aq uzyndyǵy 716 metr jańa araldyq platforma salyndy.
«Úshbıik» stansıasyndaǵy 1995 jyly salynǵan vokzalda sońǵy kúrdeli jóndeý 14 jyl buryn júrgizilgen edi. Endi onyń aýdany 83,7 sharshy metrden 201,1 sharshy metrge deıin ósti, ishki bólmeler jańartyldy, kútý jáne jolaýshylarǵa qyzmet kórsetý bólmeleri qajettiniń bárimen jabdyqtaldy.
«Jarma» stansıasyndaǵy 1996 jyly salynǵan vokzal ǵımaratyn buzyp, qaıta turǵyzý týraly sheshim qabyldandy. Jańa vokzaldyń aýdany burynǵy 217 sharshy metrdiń ornyna 347,7 sharshy metrdi quraıdy. İshki bólmeler qaıta jabdyqtaldy, kútý jáne qyzmet kórsetý aımaqtary zamanaýı talaptarǵa sáıkestendirildi. Qosymsha 650 metr perron jańartyldy.