Qazaqstan Respýblıkasy Ádilet mınıstrligi ata-analardyń balaǵa tegi, aty jáne ákesiniń atyn berý máselesine qatysty túsinikteme berdi. Buǵan qazaqstandyqtardyń áleýmettik jelilerde týý týraly kýálikti onlaın resimdeý kezinde týyndaǵan problemalarǵa shaǵymdanýy sebep boldy, dep habarlaıdy infohub.kz saıty.
Vedomstvonyń aıtýynsha, QR Azamattyq kodeksiniń 15-babyna sáıkes, azamat óz quqyqtary men mindetterin óz atymen júzege asyrady, oǵan tegi men aty, sondaı-aq qalaýy boıynsha ákesiniń aty kiredi. Sonymen qatar, «Neke (erli-zaıyptylyq) jáne otbasy týraly» kodekstiń 194-babynda týýdy memlekettik tirkeý kezinde balanyń tegi ata-anasynyń tegimen anyqtalatyny belgilengen. Ata-anasynyń tegi ártúrli bolǵan jaǵdaıda, balaǵa ata-anasynyń kelisimi boıynsha ákesiniń nemese anasynyń tegi beriledi.
Azamattardyń qalaýy boıynsha qazaq ultynyń adamdarynyń tegi men ákesiniń atyn jazýda qazaq tiline tán emes -ov, -ev, -ova, -eva, -ın, -n, -ıny, -na, -ovna, -evna, -ovıch, -evıch affıksteri qoldanystan shyǵarylatyny atap ótildi. Olardyń ornyna ákesiniń atynda -uly, -qyzy jalǵaýlary birge jazylady. Sondaı-aq qazaq ulty adamdarynyń atyn ákesiniń aty teginiń ornyna júretindeı etip jazýǵa ruqsat etiledi, bul rette tegi birinshi orynda turýy mindetti, sodan keıin aty jazylady, al ákesiniń aty qalaýy boıynsha jazylady. Ákesiniń aty teginiń ornyna -uly, -qyzy jalǵaýlarymen jazylǵan jaǵdaıda, ákesiniń aty jazylmaıdy.
Aty-jóndi jazý mysaldary keltirilgen: Ahmetov Serik Aıbekuly Aıbekuly Serik (ákesiniń aty teginiń ornyna), Ahmet Serik Aıbekuly, nemese Aıbek Serik Aıbekuly, nemese Aıbek Serik (ákesiniń aty qalaýy boıynsha kórsetiledi) dep jazylýy múmkin.
«Osyny eskere otyryp, zańnamalyq deńgeıde ata-analarǵa balanyń aty-jónin aralas jazýǵa tyıym salynbaǵan, alaıda aty-jóndi jazǵanda qazaq tiliniń gramatıkasyn eskergen jón», — dep túsindirdi vedomstvoda.
Ádilet mınıstrliginde sondaı-aq tájirıbede azamattardyń memlekettik qyzmetterdi alý úshin ekinshi deńgeıdegi bankterdiń mobıldi qosymshalaryn belsendi paıdalanatynyn atap ótti. Degenmen, azamattyq hal aktilerin memlekettik tirkeý salasyndaǵy tirkeýshi organ «Azamattarǵa arnalǵan úkimet» memlekettik korporasıasy» AQ bolyp tabylady. Qazirgi ýaqytta azamattar balanyń týýyn memlekettik tirkeý týraly ótinishti «sıfrlyq úkimet» veb-portaly arqyly, sondaı-aq HQKO-ǵa júginý nemese tikeleı azamattyq hal aktilerin memlekettik tirkeý salasyndaǵy tirkeýshi organǵa júginý arqyly bere alady.