Grekıanyń Afınaǵa jaqyn ornalasqan Salamına aralynda birneshe mınýt aralyǵynda eki órt shyǵyp, saldarynan eki adam qaza taýyp, júzdegen adam evakýasıalandy. Bul týraly infohub.kz saıty habarlaıdy.
Órt sóndirýshilerdiń málimetinshe, jalyndy sóndirýge 200-ge jýyq órt sóndirýshi jumyldyrylyp, olar Salamına aralyndaǵy eki órttiń bir-birine qosylyp ketýine jol bermeýge tyrysýda. Grek basylymdarynyń habarlaýynsha, alǵashqy órt jergilikti ýaqyt boıynsha 14:40-ta (Grınvıch boıynsha 12:40) tirkelip, qatty jeldiń saldarynan tez taraǵan. Aralda jeksenbi kúni órt qaýpi joǵary deńgeıde bolǵan.
Jaǵalaý kúzetiniń ókili Grek telearnasy ERT-ke bergen málimetinde, osy ýaqytqa deıin 90-ǵa jýyq adam teńiz arqyly evakýasıalanǵan. Onyń aıtýynsha, aımaqqa bes patrúldik kater jiberilip, taǵy birneshe jeke keme kómekke tartylǵan. Órtke qarsy birneshe áýe kemesi men 50 órt sóndirý mashınasy jumyldyrylǵan.
Salamına ákiminiń orynbasary Todorıs Zannıs órt sóndirýshilerdiń araldaǵy taýdaǵy jalyndy aýyzdyqtap, eki órttiń birigip ketýine jol bermeýge tyrysyp jatqanyn aıtty. Afınanyń batysynda ornalasqan Salamınada 37 myńǵa jýyq turǵyn bar, olardyń kóbi qart adamdar.
Aıta keteıik, bıik temperatýraǵa baılanysty bul demalys kúnderi Eýropanyń túkpir-túkpirindegi órt sóndirýshiler birneshe tabıǵı órtpen kúresip jatyr.