Qarjy monıtorıńi agenttiginiń mindetti áleýmettik medısınalyq saqtandyrý salasyndaǵy qarajatty jymqyrýdyń jolyn kesý jumystaryna baılanysty alaıaqtyq jaǵdaılary jıiledi, dep habarlaıdy infohub.kz saıty.
Alaıaqtar ózderin Agenttik qyzmetkerleri retinde tanystyryp, anyqtalǵan buzýshylyqtardy syltaýratyp, medısınalyq mekeme basshylaryn qylmystyq jaýapkershilikke tartýmen qorqytady. Olar aqsha talap etip, syıaqy úshin olardy jaýapkershilikke tartpaýǵa ýáde beredi.
Osyndaı alaıaqtyq sqema Túrkistan oblysynda áshkerelendi. Agenttik qyzmetkerleriniń atyn jamylǵan eki adam medısınalyq uıym basshysyn aldap, 15 mln teńge qarajatty ıemdenbek bolǵan. 5 mln teńgeni alǵan soń, alaıaqtar qalǵan 10 mln teńgeni berýdi talap etken.
Aǵymdaǵy jyldyń 8 tamyzynda olar Túrkistan oblysy boıynsha Ekonomıkalyq tergeý departamenti qyzmetkerlerimen Agenttiktiń İshki qaýipsizdik departamentimen birlesip, qylmys ústinde ustaldy. Sot olarǵa qatysty qamaýda ustaý túrindegi bultartpaý sharasyn sanksıalady. Tergeý jalǵasýda.
QMA eskertedi: jaýapkershilikke tartý qaýpimen nemese jazadan qutylýǵa ýáde berýmen qatar júretin kez kelgen aqsha talaby zańsyz bolyp tabylady. Mundaı faktiler týraly dereý QMA-niń 1458 nómirindegi Call-ortalyǵyna habarlaý qajet.
Azamattardy qarjy monıtorıńi organdaryna shaqyrý tek qana tergep-tekserý júrgizilip jatqan sotqa deıingi ister aıasynda, zańnamada belgilengen tártippen resimdelgen jáne jiberilgen resmı shaqyrtý qaǵazdary negizinde júzege asyrylady. Azamattardy saq bolýǵa, alaıaqtardyń aıla-tásilderine aldanyp qalmaýǵa shaqyramyz.