Túrkistan oblysynda medısınalyq uıym basshysynan 15 mln teńge alýǵa áreket jasaǵan eki alaıaq ustaldy. Olar ózderin Qarjy monıtorıńi agenttiginiń (QMA) qyzmetkeri retinde tanystyryp, qylmystyq jaýapkershilikke tartýmen qorqytqan, dep habarlaıdy infohub.kz.
QMA-de mundaı jaǵdaılar mindetti áleýmettik medısınalyq saqtandyrý júıesindegi qarajatty jymqyrýǵa qatysty tekserýler men tergeýler aıasynda jıilep ketkenin atap ótti. Osyny paıdalanǵan alaıaqtar medısınalyq mekeme basshylaryna habarlasyp, zańbuzýshylyqtar anyqtalǵanyn aıtyp, aqsha berse, qylmystyq jaýapkershilikten qutqaratyndaryn ýáde etedi.
Tergeý derekteri boıynsha, Túrkistan oblysyndaǵy eki kúdikti dál osy sqemamen áreket etken. «Ózderin QMA qyzmetkeri retinde tanystyryp, olar medısınalyq uıymdardyń biriniń basshysynan 15 mln teńge talap etken. 5 mln teńgeni alǵan soń, qalǵan 10 mln teńgeni berýdi talap etken», — delingen QMA habarlamasynda.
8 tamyzda kúdiktiler Túrkistan oblysy boıynsha ekonomıkalyq tergeý departamentiniń qyzmetkerleri men QMA-niń ishki qaýipsizdik departamentiniń birlesken is-sharasy kezinde qolǵa tústi. Sot olardy qamaýǵa alýǵa sanksıa berdi. Tergeý jalǵasýda.
Agenttikte qarjy monıtorıńi organdarynyń qyzmetkerleri qylmystyq qýdalaýdy toqtatý nemese jaýapkershilikten bosatý úshin aqsha talap etpeıtinin erekshe atap ótti. Qarjy monıtorıńi organdaryna shaqyrý sotqa deıingi tergeý aıasynda júzege asyrylýy múmkin, bul úshin zańda belgilengen tártippen resimdelgen resmı shaqyrtý jiberilýi tıis.
Vedomstvo qyzmetkerleriniń atynan bopsalaý áreketteri týraly QMA-niń 1458 nómirli call-ortalyǵyna habarlaýdy suraıdy.