49 jastaǵy qazaqstandyq aktrısa ári ánshi Aıgúl Imanbaeva «Bolashaq» baǵdarlamasy aıasynda Londonda bilim alyp, oqýyn jalǵastyryp, doktorantýraǵa túsýdi uıǵardy, dep habarlaıdy infohub.kz saıty.
Instagram-daǵy storısinde ártis testileý aldynda qatty ýaıymdaıtynyn moıyndady. «Qazir bul adamdardyń bári talapker, al bolashaqta doktorant, biraq olardyń qaısysy túsetinin tek Alla biledi. Sáttilik tileńder», — dep jazdy ol.
Emtıhannan keıin Imanbaeva qaıtadan jazylýshylarmen baılanysyp, áserimen bólisti. «Men emtıhannan shyqtym. Dedlaın 3 saǵat 10 mınýt boldy, men onda shamamen 2 jarym saǵat boldym. Ózim oqyǵan suraqtar kezdeskenine qýandym, biraq qalaı bolatynyn tek Qudaı biledi. Óıtkeni ártúrli mamandyqtarǵa túsýshiler kóp», — dedi ol.
Aktrısa shyǵarmashyl adamdar týraly stereotıpter taqyrybyn da qozǵady. «Qoǵamda ártister bilimsiz, kloýndar sıaqty tek án aıtyp, toılarda kóńil kóterýi kerek degen pikir qalyptasqan, mundaı stereotıpter burynnan qalyptasqan. Al men buǵan kelispeımin, men oqýdy, jańa nárse izdeýdi, damýdy jaqsy kóretin adammyn. Men 4 dıplom aldym. Doktorantýraǵa túskim kelýiniń sebebi — mende pedagogıka salasynda 20 jyldyq tájirıbe bar jáne zertteýge arnalǵan taqyryptar óte kóp, sonymen qatar mádenıettiń qoǵamdaǵy róli óte mańyzdy. Shyǵarmashyl adamdardyń óz mısıasy bar, muny dáleldep, keler urpaqqa kórsetý kerek, bul bizdiń qolymyzda, bizge bul qoldan keledi, óıtkeni biz orta jastaǵy adamdarmyz. Men qujattardy tek formaldy túrde, PhD doktory ataǵyn alý úshin tapsyrǵan joqpyn. Al shyǵarmashyl adamdar tek shoýmen, kloýnadamen aınalysady dep oılasańyz, qatelesesiz, aramyzda oqyp, damyp júrgender kóp», — dep atap ótti ol.
Eske salaıyq, 2023 jyldyń jazynda Aıgúl Imanbaeva «Bolashaq» baǵdarlamasymen Londonǵa oqýǵa ushqan edi. 2024 jyldyń mamyr aıynyń sońynda aktrısa oqýyn aıaqtap, dıplomyn kórsetti. Ol bilimin shákirtterine berýdi kózdeıtinin málimdedi.