Air Astana jolaýshysy Anna Magnelı Tbılısıden Almaty arqyly Danangqa ushqan kezde 3400 dollary joǵalǵanyn málimdedi. Onyń aıtýynsha, qol júgindegi konverttegi kýpúralardyń ornyna Malavı banknottary salynyp qoıylǵan, dep habarlaıdy infohub.kz saıty.
Bul týraly qyz Instagram-daǵy jeke paraqshasynda jazdy. Ol aqsha Vetnamǵa kóshken soń sonda turýǵa arnalǵanyn aıtady. Konvert, onyń sózinshe, únemi ózimen birge qol júginde bolǵan.
Páterge ornalasqan soń jolaýshy konvertti ashyp, ishinde dollar joq ekenin baıqaǵan.
«Aqsha jaı ǵana joǵalyp ketpedi. Konvertti ashyp, 3400 dollardy alyp, ornyna basqa banknottar shoǵyryn salyp qoıǵan», — dedi ol.
Konvertte dollardyń ornyna 2000 kvacha nomınalyndaǵy Malavı banknottary jatqan. Aýystyrý qaı jerde bolǵanyn qyz bilmeıdi.
Air Astana áýekompanıasy jolaýshynyń ótinishine jaýap berip, quqyq qorǵaý organdaryna júginýdi usyndy.
«Áýekompanıa sizdiń bagajyńyzǵa qatysty jaǵymsyz oqıǵa úshin shyn júrekten keshirim suraıdy. Osy derek boıynsha quqyq qorǵaý organdaryna aryzben júginip, oqıǵaǵa qatysy bar adamdardy anyqtaý, kinálilerdi jazalaý jáne shyǵyndy óteý qajet. Jolaýshylardyń bagajynyń ishindegisin urlaý faktilerin tergeý quqyq qorǵaý organdarynyń quzyretine jatady. Áýekompanıaǵa mundaı tergeý júrgizý ókilettigi berilmegen», — delingen habarlamada.
Áýekompanıa qylmys Qazaqstan Respýblıkasynan tys jerde jasalsa nemese qylmystyń jasalǵan jerin anyqtaý múmkin bolmasa, ne qylmys ártúrli jerde jasalsa, is tergeý aıaqtalǵan jerdegi sotta qaralatynyn qosty.