Qazaqstandyq ulttyq Aitu messendjeri el turǵyndaryn faıl kóshirý qıyndyǵynan, turǵylyqty jeri týraly anyqtama izdeýden jáne sheksiz kilt terúden qutqarmaq. AI & Digital Bridge 2026 forýmynda BTS Digital kompanıasy messendjerdi Qazaqstandaǵy ómirdiń «shveısarıalyq pyshaǵyna» aınaldyratyn aýqymdy jańartýdy tanystyrdy, dep habarlaıdy infohub.kz saıty.
Aıta keteıik, búginde WhatsApp el halqynyń 80%-dan astamyn qamtıtyn alyp bolyp otyr — ony 13 mıllıonnan astam qazaqstandyq paıdalanady. Otandyq Aitu ázirge óziniń turaqty aýdıtorıasyn jańa qalyptastyryp keledi: aıyna belsendi paıdalanýshylar sany 1 mıllıonnan asty. Alaıda ázirleýshiler jappaı hat almasýǵa emes, sapa men naqty salalyq paıdalylyqqa basymdyq berip otyr.
Tusaýkeserdiń basty ereksheligi — kiriktirilgen AI to You jasandy ıntellektisi. Endi anyqtama alý nemese birdeńe bilý úshin JI-kómekshige habarlama jazý jetkilikti — júıe qyzmetti ózi taýyp, bárin jınaqtap, rásimdep beredi. Osylaısha, jasandy ıntellektpen chat HQO-ǵa barýdy almastyrady.
Sonymen qatar Aitu-da otbasylyq nemese jumys qaýymdastyqtaryna birigýge, habarlamalardy qazaq jáne orys tilderi arasynda avtomatty aýdarýǵa, aqshany tikeleı dıalog ishinde aýdarýǵa jáne tek verıfıkasıalanǵan memlekettik organdar men bıznesten qaýipsiz habarlamalar alýǵa bolady.
Buǵan deıin úkimet otyrysy barysynda BTS Digital kompanıasynyń basshysy Maqsat Núridenuly ulttyq Aitu messendjerine 6,8 mln paıdalanýshy tirkelgenin málimdegen. Platformanyń aıyna belsendi aýdıtorıasy 1 mln paıdalanýshyny quraıdy, al messendjerge kún saıyn 100 myń adam kiredi.