Qazaqstandyq áıelder fýtbol klýby «Aqtóbe» Chempıondar lıgasyndaǵy alǵashqy oıynyn ıslandıalyq «Breıdablıkke» qarsy senimdi jeńispen bastady. Mach basty eýrokýboktiń ekinshi irikteý kezeńiniń jartylaı fınaly aıasynda ótti, dep habarlaıdy infohub.kz saıty.
İrikteý mını-týrnırin Aqtóbe qabyldap jatyr. Negizgi ýaqyt 1:1 esebimen teń aıaqtaldy. Alań ıeleri 12-mınýtta Qazaqstan quramasynyń jartylaı qorǵaýshysy Ekaterına Babshýktyń golymen esep ashty. Qonaqtar 16-mınýtta amerıkalyq jartylaı qorǵaýshy Ketlın Dýongtyń dál soqqysymen esepti teńestirdi.
Qosymsha ýaqytta gol soǵylmady, sondyqtan fınalǵa joldama taǵdyry penaltı serıasynda sheshildi. «Aqtóbe» fýtbolshylary dálirek soqqy jasap, 2:0 esebimen jeńiske jetti. Jeńiske sheshýshi úlesti «qyzyl-aqtardyń» reseılik qaqpashysy Zýhra Tolıbekova qosty, ol eki soqqyny qaıtardy.
Osylaısha, «Aqtóbe» irikteý týrnıriniń fınalyna shyǵyp, Jenevadan kelgen shveısarıalyq «Servett» klýbymen kezdesedi. Shveısarıalyq komanda óz jartylaı fınalynda belarýstik «Dınamony» (Mınsk) 3:0 esebimen iri jeńdi.
Fınal jeńimpazy Chempıondar lıgasynyń úshinshi irikteý raýndyna shyǵady, al jeńilgender týrnırdegi ónerin aıaqtaıdy.