Aqmola oblysynda kólik quralyn qaıta jabdyqtaǵany úshin aıyppul salynǵan avtobýs júrgizýshisi patrúlderge para talap etti dep jalǵan habarlama jasap, kek almaq boldy. Er adam polıseıler odan 5 myń teńge alǵanyn aıtqan, alaıda tekserý aıyptaýdyń jalǵan ekenin kórsetti... dep habarlaıdy infohub.kz.
Oqıǵa 18 tamyzda Astana – Qaraǵandy – Almaty tas jolynda bolǵan. Patrúlder Van Hool avtobýsyn qujattaryn tekserý úshin toqtatqan. Tekserý kezinde kólik salony qaıta jabdyqtalǵany anyqtalǵan: konstrýksıada qarastyrylǵan oryndyqtardyń ornyna uıyqtaıtyn oryndar ornatylǵan.
Shymkentten Astanaǵa bet alǵan júrgizýshige qatysty ákimshilik hattama toltyrylǵan. Er adam polıseılerdiń áreketine narazy bolyp, kek almaq bolǵan.
Kóp uzamaı «102» jelisine patrúlder odan 5 myń teńge alǵany týraly habarlama túsken. Quqyq qorǵaý organdary tekserý bastap, kóp uzamaı avtobýsty tapqan.
«Júrgizýshi alǵashynda „102“ jelisine qońyraý shalǵanyn joqqa shyǵardy. Onyń ústine, qońyraý shalynǵan SIM-kartany laqtyryp úlgergen. Alaıda tekserý barysynda polıseıler arnaıy jelige habarlama dál sol arqyly túskenin anyqtady. Keıin er adam muny hattama toltyrylǵannan keıin kek úshin jasaǵanyn moıyndady», — dedi polısıada.
Endi júrgizýshige arnaıy qyzmetterge ádeıi jalǵan qońyraý shalǵany úshin jaýapkershilik qarastyrylǵan. Oǵan qatysty ákimshilik hattama toltyrylǵan.
Polısıa «102» jelisiniń naqty oqıǵalar men quqyq buzýshylyqtar týraly habarlaýǵa arnalǵanyn eske salady. Ádeıi jalǵan qońyraý shalǵany úshin ákimshilik jaýapkershilik qarastyrylǵan.
Buǵan deıin áleýmettik jelilerde bir er adamnyń para arqyly Qazaqstan azamattyǵyn alǵanyn aıtqan vıdeo taraǵan bolatyn. İİM tekserý júrgizip, bul — sheteldik azamat jasaǵan jalǵan aqparat ekenin anyqtady.