Aqmola oblysyndaǵy Krasıvoe aýylyndaǵy temirjol stansıasynda baqytsyzdyq oqıǵasy boldy: er adam qozǵalyp kele jatqan vagonnyń astyna túsip, aýyr jaraqat aldy, dep habarlaıdy infohub.kz saıty.
Oqıǵa 27 tamyzda bolǵan. Aldyn ala boljam boıynsha, er adam vagon qozǵala bastaǵan kezde jolda turǵan. Oqıǵa mán-jaıyn tergeýshiler anyqtap jatyr.
Zardap shekken adam eki qolynan aýyr jaraqat alyp, qatty qan joǵaltqan. Ony Esil aýdandyq aýrýhanasyna jetkizgen. Er adam jergilikti turǵyn emes — ol kórshi óńirden issaparmen kelgeni belgili boldy.
Aqmola oblysy kólik polısıasy departamentinde bolǵan oqıǵaǵa túsinikteme berdi: «Aǵymdaǵy jyldyń 27 tamyzynda temirjol kóliginiń qozǵalysy men paıdalaný erejelerin buzý faktisi boıynsha Kókshetaý stansıasyndaǵy kólik polısıasy bólimi qylmystyq is qozǵady. Qazirgi ýaqytta is boıynsha qajetti tergeý áreketteri júrgizilýde. QR QPK-niń 201-babyna sáıkes ózge aqparat jarıalaýǵa jatpaıdy».
Buǵan deıin Aqmola oblysynda kópbalaly ana temirjol quramynyń astynda qaza tapqany, al Qaraǵandyda mas áıel poıyz soqqanynan aman qalǵany habarlanǵan bolatyn.