Aqmola oblysynda alaıaqtardyń qurbany bolǵan qart áıel baspanasynan jáne iri aqsha somasynan aıyryldy. Zeınetker páterin satyp, túsken aqshany bóten adamǵa tabystaǵan, dep habarlaıdy infohub.kz.
Aqmola oblysy polısıa departamentiniń baspasóz qyzmetiniń málimetinshe, oqıǵa Býrabaı aýdanynda bolǵan. Onda iri ınternet-alaıaqtyq faktisi tergelýde. Qylmystyq sqemanyń qurbany 1954 jyly týǵan jergilikti turǵyn boldy. Alaıaqtarǵa senip, ol páterin satyp, mámileden túsken 17 mıllıon teńgeni belgisiz er adamǵa bergen.
Quqyq qorǵaý organdarynyń dereginshe, alaıaqtar zeınetkermen sáýir aıynda baılanysqa shyqqan. Aldymen olar ózderin energıamen jabdyqtaý uıymynyń qyzmetkerleri retinde tanystyrǵan. Qajetti qyzmetti rásimdeý syltaýymen olar áıeldi SMS-habarlamadaǵy kodty aıtýǵa kóndirgen.
Jábirlenýshiniń jeke derekterine qol jetkizgen alaıaqtar psıhologıalyq qysymdy jalǵastyrǵan. Keıinnen zeınetkermen sóılesýge jalǵan Ulttyq bank jáne quqyq qorǵaý organdarynyń qyzmetkerleri qosyla bastaǵan. Alaıaqtardyń nusqaýlaryn oryndap, zeınetker ózine tıesili páterin satqan. Mámileden aqsha alǵan soń, áıel 17 mıllıondy úı aýlasyna kelgen belgisiz adamǵa tabystaǵan.
Býrabaı aýdanynyń polısıa bólimi alaıaqtyq faktisi boıynsha qylmystyq is qozǵady. Qazirgi ýaqytta qylmystyń barlyq mán-jaıyn, sondaı-aq alaıaqtyq áreketterdi uıymdastyrýǵa jáne jasaýǵa qatysy bar adamdardy anyqtaýǵa baǵyttalǵan qajetti jedel-tergeý is-sharalary júrgizilýde.
Polısıa alaıaqtardyń bank, memlekettik organ, quqyq qorǵaý jáne komýnaldyq uıymdardyń qyzmetkerleri bolyp jıi tanysatynyn eske salady. Túrli syltaýlarmen olar jeke derekterdi, SMS-kodtardy alýǵa, azamattardy aqshany «qaýipsiz shottarǵa» aýdarýǵa nemese kýrerge qolma-qol aqsha berýge kóndirýge tyrysady. Bank, quqyq qorǵaý organdary jáne memlekettik uıymdardyń naǵyz qyzmetkerleri SMS-kodtardy aıtýdy, belgisiz qosymshalardy ornatýdy, aqshany bóten shottarǵa aýdarýdy nemese bógde adamdarǵa qolma-qol aqsha berýdi talap etpeıtinin este saqtaý mańyzdy.