Kókshetaýda polıseıler zergerlik buıymdar men qundy zattary bar sómkeniń urlanýyn anyqtady. Keltirilgen shyǵyn shamamen 3,5 mln teńgeni qurady, dep habarlaıdy infohub.kz saıty.
Aqmola oblysy polısıa departamentiniń baspasóz qyzmetiniń málimetinshe, Kókshetaý qalalyq polısıa basqarmasynyń kezekshi bólimine 70 jastaǵy jergilikti turǵyn aryzdanǵan. Áıel Abylaı han dańǵylyndaǵy úı aýlasynda demalǵannan keıin sómkesin oryndyqta umytyp qalǵanyn, biraz ýaqyttan soń qaıtyp kelgende zattary joǵalyp ketkenin habarlaǵan. Keltirilgen shyǵynnyń jalpy somasy 3 mıllıon 470 myń teńgeni qurady.
Osy fakti boıynsha sotqa deıingi tergeý bastaldy. Jedel-izdestirý is-sharalary barysynda polıseıler jedel basqarý ortalyǵynyń beınebaqylaý kameralarynyń, sondaı-aq qylmys jasalǵan aýdandaǵy turǵyn úılerge, saýda nysandaryna jáne ózge de uıymdarǵa ornatylǵan kameralardyń jazbalaryn alyp, muqıat zerdeledi. Beınejazbalardy taldaý jábirlenýshi sómkeni oryndyqta qaldyrǵannan keıingi oqıǵalardyń retin anyqtaýǵa, sondaı-aq zatty taýyp alǵan áıeldiń belgilerin aıqyndaýǵa múmkindik berdi.
Ol qaraýsyz qalǵan zattardy baıqap, biraz ýaqyt ıesiniń kelýin kútken. Keıin áıel sómkeni alyp ketken, alaıda ony polısıaǵa ótkizbegen. Onyń aıtýynsha, úıge bara jatqanda sómkedegi uıaly telefondy, qol saǵatyn jáne zergerlik buıymdardy alyp, sómkeni tastap ketken.
Kelesi kúni qarjylyq qıyndyqtarǵa tap bolǵan kúdikti tapqan altyn saqınalarynyń birin lombardqa ótkizip, 150 myń teńge alǵan. Túsken aqshany azyq-túlik pen dári-dármek satyp alýǵa jumsaǵan.
Qazirgi ýaqytta qylmystyq is boıynsha qajetti tergeý áreketteri júrgizilýde.