AQSh áskerleri dúısenbi kúni keshke Iranǵa sońǵy soqqylaryn aıaqtady. AQSh Ortalyq qolbasshylyǵynyń málimetinshe, soqqylar ırandyq áskerı komandalyq ortalyqtar, zymyran jáne ushqyshsyz ushý apparattaryn ushyrý alańdary, teńiz kúshteri men áýe qorǵanys júıelerine baǵyttalǵan. Bul týraly qolbasshylyq X áleýmettik jelisinde habarlady, dep habarlaıdy infohub.kz saıty.
Sońǵy soqqylar shamamen bes saǵatqa sozylyp, AQSH-tyń Iranǵa qatarynan 10-shy túngi shabýyly boldy. Vashıngton muny «Hormuz buǵazy arqyly ótetin komersıalyq kemelerge Irannyń shabýyl jasaý múmkindigin álsiretý» maqsatynda jasap jatqanyn málimdedi.
Soǵys 28 aqpanda AQSh pen Izraıldiń Iranǵa jasaǵan shabýylynan bastalyp, Iran óz kezeginde Izraıl men AQSh áskerı bazalary ornalasqan Parsy shyǵanaǵy elderine soqqy berdi. Soǵys saldarynan myńdaǵan adam qaza taýyp, mıllıondaǵan adam úılerin tastap ketýge májbúr boldy. Soǵys munaı baǵasynyń ósýine jáne álemdik naryqtardyń turaqsyzdyǵyna ákeldi.
AQSh áskerleriniń qaza tapqan sany demalys kúnderi 17-ge jetti. Dúısenbi kúni prezıdent Tramp AQSh áskerleriniń qazasynan keıin Irannan kek alýdy ýáde etti. Ótken aptada Tramp nysana tizimin keńeıtip, energetıkalyq zaýyttar men kópirlerdi de soǵý qaýpin tóndirdi. Alaıda 1949 jylǵy Jeneva konvensıalary azamattyq mańyzy bar nysandarǵa shabýyl jasaýǵa tyıym salady. Tramptyń buǵan deıingi mundaı qaýipterinen keıin AQSH-tyń halyqaralyq quqyq mamandary bul áreketter soǵys qylmysy sanalýy múmkin ekenin aıtqan edi.