AQSh 3 tamyzdan bastap keıbir memleketter azamattaryna arnalǵan vıza kepili baǵdarlamasyn pılottyq rejımnen turaqty rejımge kóshiredi. Jańa erejeler B-1, B-2 jáne B-1/B-2 sanattaryndaǵy týrısik jáne iskerlik vızaǵa ótinish berýshilerge qatysty bolady, dep habarlaıdy infohub.kz saıty.
Mindetti kepil engiziletin elder tizimine 50 memleket kirdi, onyń ishinde Aljır, Angola, Antıgýa jáne Barbýda, Bangladesh, Benın, Býtan, Botsvana, Býrýndı, Kabo-Verde, Kambodja, Ortalyq Afrıka Respýblıkasy, Kot-d’Ivýar, Kýba, Djıbýtı, Domınıka, Efıopıa, Fıdjı, Gabon, Gambıa, Grýzıa, Grenada, Gvıneıa, Gvıneıa-Bısaý, Qyrǵyzstan, Lesoto, Malavı, Mavrıtanıa, Mavrıkı, Mońǵolıa, Mozambık, Namıbıa, Nepal, Nıkaragýa, Nıgerıa, Papýa — Jańa Gvıneıa, San-Tome jáne Prınsıpı, Senegal, Seıshel araldary, Tájikstan, Tanzanıa, Togo, Tonga, Týnıs, Túrikmenstan, Tývalý, Ýganda, Vanýatý, Venesýela, Zambıa jáne Zımbabve. Qazaqstan bul tizimge enbedi.
AQSh Memlekettik departamentiniń túpkilikti erejesine sáıkes, konsýldyq qyzmetker ótinish berýshiniń jaǵdaıyn eskere otyryp, kepil mólsherin $10 myń, $15 myń nemese $20 myń dep belgileı alady. Bazalyq soma $15 myń dep esepteledi, alaıda ony azaıtýǵa nemese kóbeıtýge bolady.
Baǵdarlama AQSH-ta ruqsat etilgen merzimnen artyq bolý deńgeıi joǵary, aqparat almasýy jetkiliksiz, jeke basyn jáne sottalǵandyǵyn tekserýde problemalary bar, sondaı-aq jol júrý jáne azamattyq qujattardyń qaýipsizdigine qatysty máseleleri bar elderdiń azamattaryna qatysty. Qatysýshylar tizimi Memlekettik departamenttiń saıtynda jarıalanǵan jáne jańartylyp turýy múmkin. Jańa el oǵan óz azamattaryna qoıylatyn talaptar kúshine engenge deıin keminde 15 kún buryn engizilýi tıis.
Kepil vıza berýdiń shartyna aınalady. Aqsha saıahatshy vızany paıdalanbasa nemese turý sharttaryn saqtap, komersıalyq áýejaı arqyly AQSH-tan ýaqytynda ketse, qaıtarylady. Vıza talaptaryn eleýli buzǵan jaǵdaıda búkil soma ustalyp qalýy múmkin.
Baǵdarlama boıynsha resimdelgen vızalar bir rettik nemese kóp rettik kirýge úsh aıdan bir jylǵa deıin berilýi múmkin. Olardyń ıelerine AQSH-qa kirýge jáne elden tek komersıalyq áýejaılar arqyly shyǵýǵa ruqsat etiledi — qurlyq nemese teńiz shekarasyn kesip ótý kepil sharttaryna sáıkes kelmeıdi.
Memlekettik departamenttiń derekteri boıynsha, pılottyq baǵdarlamaǵa 50 el engizildi. Alǵashqy on aıda qatysýshylar arasynda merzimdi buzý jaǵdaılary 2024 qarjy jylynda tirkelgen 45 488-den 50-den azǵa deıin qysqardy. Bul rette osy elderdiń azamattaryna berilgen vızalar sany 83%-ǵa tómendedi.
Buǵan deıin «Kýrsıv» qazaqstandyqtar úshin AQSh vızasyn alý kúrdeli jáne boljaý qıyn proses bolyp qala beretinin habarlaǵan: týrısik jáne iskerlik vızalar boıynsha túzetilgen bas tartý deńgeıi 51,75%-ǵa jetedi. Almatyda suhbatqa jazylýdy orta eseppen 45 kún, Astanada 90 kúnge deıin kútýge týra keledi, al konsýldyq alym $185 quraıdy. Vıza mamandary sondaı-aq jalǵan anyqtamalar, jalǵan brondar jáne burynǵy bas tartýlardy jasyrý kóp jyldyq kirýge tyıym salýǵa ákelýi múmkin ekenin eskertken.