Aqtaýda 16-mıkroaýdandy keshendi abattandyrý jumystary aqyry qolǵa alyndy. Qurylys salynǵannan beri 10 jylǵa jýyq ýaqyt ótse de, turǵyndar trotýar, jol, ınjenerlik jeli sıaqty qarapaıym qolaılylyqtarsyz ómir súrip kelgen edi, dep habarlaıdy infohub.kz.
16-mıkroaýdan 2010 jyldardyń basynda qalanyń jańa turǵyn aımaǵy retinde qarqyndy damı bastady. Birneshe jyldyń ishinde munda ondaǵan kópqabatty úı salyndy, biraq turǵyn úı qurylysynyń qarqyny qajetti ınfraqurylymmen qatar júrmedi. Jańa turǵyn keshender paıdalanýǵa berilgennen keıin irgeles aýmaqtar abattandyrylmaı qaldy: trotýarlar bolmady, ishki kvartaldyq joldar asfálttanbady. Jańbyrly kúnderi kósheler laıly batpaqqa aınalsa, jazda turǵyndar shańnan tunshyqty.
Jergilikti turǵyndardyń aıtýynsha, abattandyrý jumystarynyń aıaqtalmaýy kúndelikti ómirdi qıyndatqan. Aqtaý qalalyq ákimdiginiń málimetinshe, qazirgi tańda mıkroaýdanda 4300 metr sý qubyry, 3067 metr káriz jáne 2570 metr jylý jelileri jańartylǵan. Shamamen 4000 metr asfáltbeton jabyny tóselgen. İshki kvartaldyq avtojoldar men jaıaý júrginshiler joldarynyń qurylysy jalǵasýda. Aldaǵy kúnderi búlingen jol ýchaskelerin qalpyna keltirip, jol belgilerin ornatyp, jol syzyqtaryn syzý josparlanýda.
Sonymen qatar, 27-mıkroaýdandaǵy «Báıterek» saýda ortalyǵynan bastap 16, 17, 18A jáne 19-mıkroaýdandardyń qıylysyna deıingi káriz kolektoryn tolyq rekonstrýksıalaý jalǵasýda.
16-mıkroaýdan turǵyndarynyń negizgi jaǵdaıdyń joqtyǵyna shaǵymdanýy jyl saıyn jalǵasyp kelgen. 2018 jyly «Jeńis» turǵyn úı kesheniniń turǵyndary jylý máselesine shaǵymdansa, 2021 jyly №61 úıde gazdyń joqtyǵyna narazylyq bildirgen. 2023 jyly qoqys konteınerleriniń tapshylyǵy, qoqys úıindileri men joldardyń jaǵdaıy kóterilgen. 2024 jyly bılik jol jáne ınjenerlik jeli qurylysy úshinshi toqsanda bastalady dep ýáde bergen. Ýaqyt kórsetkendeı, abattandyrý jumystary endi ǵana júrgizilýde.