11 tamyz keshinde Aqtaý turǵyndary áskerı Sý-27 ushaǵy men ushqyshsyz ushý apparatynyń ushyp ótkenin kórdi. Kýágerler bolǵan oqıǵany beınege túsirip aldy, dep habarlaıdy infohub.kz saıty.
Aıta keteıik, Sý-27 ushaǵy sol kúni keshke qala aspanynda baıqalǵan. Sonymen qatar, Aqshuqyr aýylynyń ústinen ushqyshsyz ushý apparaty kóringen. Kýágerlerdiń aıtýynsha, BPLA áýejaı jaǵynan Aqtaý baǵytyna ushqan.
Qazaqstan Respýblıkasy Qorǵanys mınıstrligi buǵan deıin azamattarǵa 2026 jyldyń tamyz-qyrkúıek aılarynda «Batyl toıtarys – 2026» strategıalyq komandalyq-shtabtyq oqý-jattyǵýy ótetinin habarlaǵanyn túsindirdi. Oqý-jattyǵýǵa daıyndyq aıasynda el aýmaǵynda qarý-jaraq, áskerı tehnıka jáne jeke quramdy áskerı daıyndyq is-sharalary ótetin aýdandarǵa jyljytý júzege asyrylýda.
Áskerdi tasymaldaý aralas tásilmen – temirjol eshelondarymen, jalpy paıdalanymdaǵy joldarmen avtomobıl kolonnalarymen, sondaı-aq armıa avıasıasyn paıdalaný arqyly júrgiziledi. Oqý-jattyǵý keshendi sıpatqa ıe jáne Qazaqstannyń búkil aýmaǵyndaǵy oqý polıgondaryn qamtıdy. Manevrler kezinde áskerıler qurlyqta, áýe keńistiginde, teńizde jáne kıberkeńistikte áskerdi qoldaný jáne aralyq ózara is-qımyl máselelerin pysyqtaıdy.
«Ótkizilip jatqan is-sharalar josparly sıpatta jáne áskerı qyzmetshilerdiń jaýyngerlik daıyndyǵyn arttyrýǵa, áskerı basqarý organdarynyń ózara is-qımylyn jetildirýge jáne Qarýly kúshterdi qoldanýdyń zamanaýı tásilderin pysyqtaýǵa baǵyttalǵan», – delingen habarlamada.
Osyǵan baılanysty turǵyndardy sabyr saqtaýǵa, resmı aqparatqa súıenýge jáne tekserilmegen málimetterdi taratpaýǵa shaqyrdy. Vedomstvo ádeıi jalǵan aqparat pen rastalmaǵan málimetterdi taratqany úshin jaýapkershilik bar ekenin de eske saldy.