Mańǵystaý oblysynda eki kúdikti ustalyp, olardan iri kólemdegi aqsha qarajaty men 100 gramnan astam apıyn tárkilendi, dep habarlaıdy infohub.kz.
Oblystyq polısıa departamentiniń baspasóz qyzmetiniń málimetinshe, 5 tamyzda Mańǵystaý oblysy PD ekstremızmge qarsy is-qımyl basqarmasynyń qyzmetkerleri oblys prokýratýrasynyń úılestirýimen eki kúdiktini ustaǵan.
Birinshi kúdiktiniń avtokóligin qarap tekserý kezinde polıseıler 600 myń teńge taýyp, tárkilegen. Keıin ekinshi kúdikti ustalyp, onyń kóliginen 480 myń teńge tabylǵan.
Aqtaýdaǵy jaldamaly páterdi tintý kezinde jalpy salmaǵy 100,8 gram apıyn esirtki zaty bar 10 orama jáne polıetılen paket tabylyp, tárkilendi. Sondaı-aq elektrondy tarazy, esirtki daıyndaýǵa jáne tutynýǵa arnalǵan quraldar men 670 myń teńge alyndy.
Medısınalyq kýálandyrý eki ustalǵan adamnyń da esirtkilik masań kúıde ekenin anyqtady. Qazaqstan Respýblıkasy Qylmystyq kodeksiniń 297-babynyń 3-bóligi boıynsha qylmystyq is qozǵaldy. Kúdiktiler Aqtaý qalalyq polısıa basqarmasynyń ýaqytsha ustaý ızolátoryna qamaldy.
Tergeý jalǵasýda.