Aqtóbede jyljymaıtyn múlik satyp alýǵa baılanysty alaıaqtyq jasady degen kúdikke ilingen áıel ustaldy. Tergeý derekterine sáıkes, onyń áreketinen Qosshy qalasynyń keminde eki turǵyny zardap shekken, jalpy shyǵyn 22 mln teńgeni quraǵan, dep habarlaıdy infohub.kz.
Tergeý nusqasy boıynsha, áıel páter satyp alýdy jeleý etip, azamattardan 14 mln jáne 8 mln teńge alǵan, sodan keıin izin sýytqan. Shilde aıynda ol izdeý jarıalanǵan.
«Jedel-izdestirý is-sharalary barysynda polıseıler kúdiktiniń Aqtóbede ekenin anyqtady. Jergilikti áriptesterdiń kómegimen ol ustalyp, ýaqytsha ustaý ızolátoryna qamaldy», — dep habarlady Aqmola oblysy PD baspasóz qyzmeti.
Ustalǵannan keıin áıeldiń Aqtóbedegi mektepterdiń birinde muǵalim bolyp jumys istegeni belgili boldy. Qazir quqyq qorǵaý organdary onyń jumysqa ornalasý mán-jaılaryn jáne jumysqa qabyldaý kezinde usynǵan qujattarynyń túpnusqalyǵyn tekserip jatyr.
Sondaı-aq tergeý jalǵan qujattar men anyqtamalardy paıdalaný múmkindigin qarastyrýda.
Buǵan deıin «Kýrsıv» QR İİM jasandy ıntellektti qoldanatyn alaıaqtyq týraly eskertkenin jazǵan bolatyn. Qylmyskerler týystarynyń nemese tanystarynyń daýysy men kelbetin burmalap, adamdy shuǵyl túrde aqsha aýdarýǵa sendirýi múmkin. Polısıa mundaı ótinishterdi qaıta tekserýdi, jaqyndaryńyzǵa ózderińiz qońyraý shalýdy jáne bank kartalarynyń derekterin, SMS-kodtar men parо́lderdi habarlamaýdy usynady.