Aqtóbede bir aıdan astam ýaqyt boıy avtobólshekter dúkeniniń satýshysynan aqsha bopsalaǵan eki er adamǵa qatysty sot prosesi aıaqtaldy. Olar ony pyshaqpen jáne órt qoıýmen qorqytqan. Keltirilgen shyǵynnyń jalpy somasy bir mıllıon teńgeden asty, dep habarlaıdy infohub.kz.
«Dıapazon» basylymynyń málimetinshe, jábirlenýshi avtobólshekter satatyn býtikte satýshy bolyp jumys istegen. Alǵashqy bolyp odan aqsha talap etken 24 jastaǵy tanysy 20 myń teńge suraǵan. Birneshe kúnnen keıin ol satýshynyń jumys ornyna qaıta kelip, 400 myń teńgeni alyp ketken.
Keıin oǵan taǵy bir dosy qosylyp, ekeýi býtikke únemi kelip, aqsha talap ete bastaǵan. Qurbandy odan ári qorqytý úshin olar pyshaq kórsetip, býtikti taýarymen birge órtep jiberetinin aıtqan. Qoryqqan jas jigit qaraqshylarǵa ne surasa da berip, tipti nesıe de rásimdegen. Bul jaǵdaı bir aıdan astam ýaqytqa sozylyp, sońynda berilgen aqshanyń jalpy somasy 1 mıllıon 20 myń teńgeni quraǵan.
Sotta eki aıyptalýshy da kinásin moıyndap, jábirlenýshige keltirilgen zalaldy tolyq ótegendikten, jazasyn jeńildetýdi suraǵan. Satýshy er adamdardyń pyshaqpen kelgenin rastap, ómiri men taýary úshin qoryqqandyqtan aqshanyń bir bóligin nesıege alýǵa májbúr bolǵanyn aıtqan.
Aıyptaýlardyń aýyrlyǵyna qaramastan, jábirlenýshi aıyptalýshylarǵa eshqandaı talaby joq ekenin, olardy keshirgenin jáne medıatıvtik kelisim jasasqanyn málimdegen. Nátıjesinde ekeýi de naqty merzimnen qutylyp, erkindikte qaldy. Sot olardy úsh jylǵa bas bostandyǵyn shekteý jazasyna kesip, jumyspen qamtý ortalyǵyna jumyssyz retinde tirkelýge mindettedi.