Aqtóbede Qazaqstandaǵy tuńǵysh mýltıbrendtik KAMAZ servıs ortalyǵynyń qurylysy bastaldy. Nysan Ońtústik aınalma joldyń boıynda ornalasyp, aýyr jáne arnaıy tehnıkaǵa qyzmet kórsetýge baǵyttalady, dep habarlaıdy infohub.kz saıty.
Jobaǵa salynatyn jalpy ınvestısıa kólemi 3,5 mlrd teńgege baǵalanyp otyr. Kásiporyn iske qosylǵanda óńirde 70 jańa jumys orny ashylady. Bekitilgen josparǵa sáıkes, servıs ortalyǵynyń qýaty jylyna 5 myńǵa deıin operasıa jasaýǵa múmkindik beredi. Joba bastamashysynyń málimetinshe, nysan Qazaqstandaǵy osyndaı gıbrıdtik formattaǵy alǵashqy servıs ortalyǵy bolady.
Aqtóbe oblysy ákiminiń orynbasary Abzal Ábdikárimov qurylys alańyna baryp, ınvestorlardyń nazaryn jumystyń sapaly oryndalýy qajettigine aýdardy.
«Kásipkerler men shaǵyn jáne orta bıznes ókilderin qoldaý — bizdiń basty mindetterimizdiń biri. Jumysty toqtatpaı, jobany belgilengen merzimde aıaqtaý mańyzdy», — dedi Abzal Ábdikárimov sapar barysynda.
Aqtóbe oblysy ákimdiginiń resmı habarlamasynda jobanyń naqty zańdy tulǵasy nemese ıesi ashylmady.
«KAMAZ» AAQ — aýyr júk kólikterin shyǵaratyn reseılik óndirýshi. Eń iri úlesker — kásiporyn aksıalarynyń 47,1%-y tıesili reseılik «Rosteh» memlekettik korporasıasy. Qazaqstanda brend tarıhı túrde «KAMAZ-Injınırıng» AQ qurastyrý kásiporny (Kókshetaý qalasynda tehnıka shyǵarý) jáne KamLitKZ zaýyty (júk kólikterine shoıyn quıý ónimin shyǵarý) arqyly tanylǵan.
Buǵan deıin qazaqstandyq qurastyrý kásipornynyń quryltaıshylary reseılik «KAMAZ» AAQ (baqylaý paketi) jáne «Qazaqstan ınjınırıń» ulttyq kompanıasy bolǵan. Alaıda 2025 jyldyń sońynda reseılik avtokonsern bıznesti qaıta qurylymdaý jáne sanksıalyq táýekelderdi azaıtý aıasynda qazaqstandyq «enshiles» kompanıasynyń iri tikeleı úleskerleri qatarynan shyǵyp, aktıvterdi jeke qurylymdarǵa berdi.