Ақтөбеде оқушыларды тегін ыстық тамақпен қамтамасыз ететін кәсіпкерлер оқу жылы басталғаннан бері көрсеткен қызметі үшін ақы ала алмай отыр. Бизнесмендер жұмысты жалғастыра алмаудан қорқады, өйткені азық-түлікке және аспазшылардың жалақысына жұмсалатын өз қаражаттары сарқылып барады, деп хабарлайды infohub.kz сайты.
КТК телеарнасының дерегінше, кәсіпкерлер көрсетілген қызмет үшін ақы әлі төленбегенін айтқан. Мәселе жақын арада шешілмесе, мектептердегі тамақтандыру жұмысы қауіп төнуі мүмкін.
«Бар ресурсымыздың бәрін сарқып болдық. Кредит алдық, қолда бар қымбат бұйымдарды да өткіздік. Айтуға ұят, бірақ айтайын. Бізді күрекпен ақша сыпырып жүргендер деп ойлайды, ал біз балаларды тамақтандырып отырмыз. Мен мың жарымға жуық баланы тамақтандырамын. Күніне қанша қаражат керек екенін ойлап көріңіз», — деді кәсіпкер Шолпан Тастыбаева.
Қазақстандық мектептерде тегін ыстық тамақпен бастауыш сынып оқушылары, сондай-ақ әлеуметтік тұрғыдан осал санаттағы жекелеген балалар қамтамасыз етіледі. Мұны тендер қорытындысы бойынша мектеп асханаларын жалға алған кәсіпкерлер ұйымдастырады. Олардың қызметіне жергілікті бюджеттен төлем жасалуы тиіс. Алайда Ақтөбеде жеткізушілермен есеп айырысу екінші ай қатарынан кешіктіріліп отыр.
Бизнесмендер әкімдікке жүгінген, бірақ әзірге мәселе шешілмеді. Енді олар прокуратураның көмегіне үміт артып отыр. Сонымен қатар келесі аптада оқушылар демалыстан кейін қайта партаға оралады. Кәсіпкерлерге азық-түлік сатып алып, қызметкерлерге жалақы төлеу қажет, бірақ олардың айтуынша, бұған қаражат іс жүзінде қалмаған.
Шенеуніктер мәселе шешіліп жатқанын уәде етеді. «Мектеп тағамын жеткізушілердің алдындағы берешекті өтеу жұмыстары жүргізіліп жатыр. Қазір қажетті рәсімдер жүргізілуде. Төлемдер жақын күндері жасалады деп жоспарлануда», — деп сендірді Ақтөбе облысының білім басқармасы.