Aqtóbede «Quqyqtyq tártip» jedel-aldyn alý is-sharasy aıasynda polısıa qyzmetkerleri qaladaǵy túngi klýbtardyń birinde jedel tekserý júrgizdi. Tekserý nátıjesinde quqyq buzýshylyq faktileri anyqtalyp, tyıym salynǵan zattar alyndy, dep habarlaıdy infohub.kz saıty.
Óńirlik polısıa departamentiniń baspasóz qyzmetiniń málimetinshe, prokýratýranyń úılestirýimen tintý is-sharalary júrgizildi. Klýb úı-jaıynan, atap aıtqanda erler dárethanasynan esirtkige uqsas zattary bar úsh orama tabylyp, alyndy. Sonymen qatar, metal kastet pen eki qatparly pyshaq tárkilendi.
Bar sóresiniń janynan tórt kalán tabyldy. Sondaı-aq, tekserý kezinde klýbta 2009 jyly týǵan kámeletke tolmaǵan bala bolǵany anyqtaldy, bul kámeletke tolmaǵandardyń túngi ýaqytta oıyn-saýyq mekemelerinde bolýyna zańdyq tyıym salýdy buzý bolyp tabylady.
Anyqtalǵan faktiler boıynsha mekeme ákimshiligine QR ÁQBtK-niń 132-baby (kámeletke tolmaǵannyń túngi ýaqytta oıyn-saýyq mekemesinde bolýyna jol berý), 441-babynyń 1-bóligi (temeki buıymdaryn, onyń ishinde qyzdyrylatyn temekini tutynýǵa tyıym salýdy buzý) jáne 200-babynyń 1-bóligi (аlkogól ónimin ótkizý salasyndaǵy QR zańnamasy talaptaryn buzý) boıynsha ákimshilik quqyq buzýshylyq týraly hattamalar jasaldy.
Sonymen qatar, tekserý mekeme kúzetshileriniń eńbek sharttaryn jasaspaı jumys istegenin kórsetti. Polısıa bólimine 17 adam jetkizildi.
Alynǵan zattardyń quramy men esirtkige nemese ózge de aınalymy tyıym salynǵan zattarǵa jatatynyn anyqtaý úshin saraptamaǵa jiberildi. Qazirgi ýaqytta oqıǵanyń barlyq mán-jaıyn jáne tyıym salynǵan zattardyń zańsyz aınalymyna qatysy bar adamdardy anyqtaýǵa, sondaı-aq yqtımal quqyqqa qarsy áreketterdi qujattandyrýǵa baǵyttalǵan tergeý is-sharalary júrgizilýde.
Saraptamalar men tergeý áreketteriniń nátıjeleri boıynsha Qazaqstan Respýblıkasynyń zańnamasyna sáıkes qatysy bar adamdardyń áreketterine quqyqtyq baǵa beriletin bolady.