Aqtóbedegi ondaǵan turǵyn shetelge demalysqa usha almaı qaldy: týr aqysyn tólegennen keıin kompanıa baılanysqa shyqpaı qoıdy, dep habarlaıdy infohub.kz saıty.
Týrıser keltirilgen shyǵyn mıllıondaǵan teńgeni quraıtynyn aıtady. Aqtóbelikter demalystaryn Túrkıada, Mysyrda jáne Grýzıada ótkizýdi josparlaǵan edi, biraq sońynda úıde qaldy.
«Biz 5-ten 13 tamyzǵa deıin, jeti kúnge Antalıaǵa týr satyp aldyq. Ushý Almatydan boldy. Biz otbasymyzben Almatyǵa keldik, bizge bıletterdi jiberemiz dep ýáde berdi. Biraq ushýǵa bir kún qalǵanda kenetten týrymyzdyń kúshi joıylǵanyn habarlady. Men fırmaǵa shamamen 2 mıllıon teńge tóledim», — dep ashýlandy Asylbek Dúısenbekov.
Týrfırmany klıentterge dostary men tanystary usynǵan. Olardyń kóbi buryn onyń qyzmetin paıdalanyp, shetelge sátti sapar shekken.
Zardap shekkenderdiń aıtýynsha, aldymen menedjerler kezdesýlerdi keıinge shegerip, sapar máselelerin sheshemiz dep ýáde bergen, keıin múldem qońyraýlar men habarlamalarǵa jaýap bermeı qoıǵan.
Qazir zardap shekkender birigip, polısıaǵa aryz berýde. Týrfırmaǵa alǵashqy ótinish 6 tamyzda túsken, al búgingi kúni resmı túrde 17 adam aryz bergen. Kompanıanyń ıesi, keıbireýler ony jeke biletin, qazir qaıda júrgenin polısıa anyqtap jatyr.
«Polısıa departamenti alaıaqtyq faktisi boıynsha sotqa deıingi tergeý júrgizýde. Sondaı-aq, jeke basy anyqtalǵan kúdiktiniń ornalasqan jerin anyqtaý boıynsha jedel-izdestirý is-sharalary júrgizilýde», — dep habarlady Aqtóbe oblysy PD baspasóz qyzmetiniń jetekshisi Erbolat Sarqulov.