Aqtóbede velokýrer 12 jasar qyzdy qaǵyp, oqıǵa ornynan qashyp ketti. Zardap shekken qyzdyń anasy bolǵan oqıǵanyń mán-jaıyn aıtyp berdi, dep habarlaıdy infohub.kz.
Oqıǵa «Sazdy» aýdanynda bolǵan. Qyz úıiniń mańynda velosıpedpen júrgen. Anasynyń aıtýynsha, oǵan eresek er adam basqarǵan elektrovelosıped soqqan. Balany qaǵyp ketse de, ol toqtamaı, ári qaraı júrip ketken. Jedel járdemdi kezdeısoq ótip bara jatqandar shaqyrǵan.
Zardap shekken qyzdy oblystyq balalar aýrýhanasyna jetkizgen. Dárigerler joǵarǵy jaq súıeginiń jáne bet súıeginiń synýyn, sondaı-aq aldyńǵy tisteriniń synyp qalǵanyn anyqtaǵan. Qyzǵa operasıa jasalǵan, qazir ol jaqsaryp keledi, biraq alda uzaq qalpyna keltirý kezeńi kútip tur. Anasynyń aıtýynsha, jaqyn arada tis protezdeý múmkin emes, tek eresek kezinde ǵana ımplant qoıýǵa bolady.
Beınebaqylaý kameralarynyń arqasynda kinálini dereý anyqtaǵan. Ol 58 jastaǵy jergilikti turǵyn bolyp shyqty. Zardap shekken qyzdyń anasy oǵan eń qatań jaza qoldanýdy talap etedi. Ol qyzynyń qatty shok pen aýyrsynýdy bastan ótkergenin, endi ony uzaq emdeý kútip turǵanyn atap ótti.
Oblystyq qoǵamdyq densaýlyq saqtaý basqarmasy balanyń jaǵdaıyna qatysty túsinikteme berdi. Bólim meńgerýshisi Álıa Sharbakovanyń aıtýynsha, jaq-bet hırýrginiń tekserýinen keıin qyz shuǵyl túrde aýrýhanaǵa jatqyzylyp, operasıa jasalǵan. Barlyq qajetti medısınalyq kómek kórsetilgen, oń dınamıka baıqalady: isik basylǵan, jaralar jazylyp jatyr. Naýqas ambýlatorıalyq emdeýge shyǵarylǵan, ortopedıalyq jáne stomatologıalyq emdeý usynylǵan.
Eske sala keteıik, buǵan deıin Aqtóbede balany qaǵyp, jol apaty ornynan qashyp ketken velokýrerdi izdegeni habarlanǵan bolatyn. Polıseıler elektrovelosıped júrgizýshisiniń jeke basyn anyqtady.