Aqtóbe qalalyq soty jumys berýshini jaraqat alǵan qyzmetkerge moraldyq shyǵynnyń ornyn toltyrý retinde 10 mıllıon teńge tóleýge mindettedi. Er adam óndiristegi jazataıym oqıǵa saldarynan aýyr jaraqat alyp, múgedek bolyp qaldy, dep habarlaıdy infohub.kz saıty.
Sot otyrysy barysynda oqıǵa jumys berýshiniń kinásinen bolǵany anyqtaldy. Ol qaýipsiz eńbek jaǵdaıyn qamtamasyz etpegen jáne eńbekti qorǵaý salasyndaǵy zańnama talaptaryn saqtamaǵan. Nátıjesinde jumysshy aýyr dene jaraqatyn alǵan.
İs qujattary men medısınalyq saraptama qorytyndylaryna sáıkes, talapkerge II top múgedektigi belgilenip, kásibı eńbekke qabilettiliginiń joǵalý dárejesi 80 paıyzdy quraǵan.
Sot usynylǵan dáleldemelerdi baǵalaı kele, talapkerdiń talaptaryn ishinara negizdi dep tanydy. Moraldyq shyǵynnyń mólsherin anyqtaý kezinde alynǵan jaraqattardyń sıpaty men aýyrlyǵy, emdelý uzaqtyǵy, múgedektiktiń belgilenýi, fızıkalyq jáne rýhanı azaptyń dárejesi, sondaı-aq eńbek qyzmetin júzege asyrý múmkindiginiń aıtarlyqtaı shektelýi jáne burynǵy ómir saltynyń buzylýy eskerildi.
Sot sheshimimen jumys berýshiden talapkerdiń paıdasyna 10 mıllıon teńge kóleminde moraldyq shyǵyn ótemaqysy, sondaı-aq dári-dármek pen emdelýge baılanysty kólik shyǵyndaryn qamtıtyn 255 myń teńge kólemindegi materıaldyq zalal óndirildi.
Sot sheshimi zańdy kúshine áli engen joq.