Sońǵy kezderi qazaqstandyqtarǵa «kepildi tabys» pen «táýekelsiz ınvestısıa» usynatyn alaıaqtardyń habarlamalary jıi kelip jatyr. Bul týraly Polisia.kz-ke silteme jasap, infohub.kz saıty habarlaıdy.
Polisia.kz Telegram-arnasynda atap ótilgendeı, alaıaqtar áleýmettik jeliler arqyly azamattardy kúmándi ınvestısıalyq jobalarǵa qatysýǵa shaqyrady. Olar ózderin broker, ınvestısıalyq kompanıa qyzmetkeri nemese qarjy sarapshysy retinde tanystyryp, «joǵary tabys», «kepildi paıda» jáne «táýekelsiz ınvestısıa» ýáde etedi. Aldymen qurbanǵa az ǵana soma salýdy usynady, sodan keıin jalǵan saıt nemese qosymsha arqyly aqshanyń ósip jatqanyn kórsetedi. Keıin «ınvestısıany ulǵaıtý», «komısıa tóleý» nemese «shotty qaıta ashý» syltaýymen qosymsha aqsha aýdarýdy talap etedi.
Adam aqshany shyǵarýǵa tyrysqanda, saıt jumysyn toqtatady, akkaýnt buǵattalady, al «keńesshi» iz-túzsiz joǵalady. Nátıjesinde azamat salǵan barlyq aqshasynan aıyrylady.
Alaıaqtyq jaǵdaılarynyń kóbeıýine baılanysty İshki ister mınıstrligi qazaqstandyqtarǵa eskertý jasady. Quqyq qorǵaý organdary 100% kepildikpen joǵary tabys ýáde etetinderge senbeýge, «birneshe kúnde aqshany birneshe ese kóbeıtý» usynystarynan saq bolýǵa, shuǵyl sheshim qabyldaýdy talap etetin adamdarǵa senbeýge, beıtanys adamdardyń nusqaýymen aqsha aýdarmaýǵa, bank kartasynyń derekterin, CVV-kod pen SMS-kodtardy eshkimge aıtpaýǵa, kúdikti siltemelerge ótpeýge jáne belgisiz qosymshalardy ornatpaýǵa shaqyrady.