Almatyda Egizbaeva kóshesindegi jańa mektep mańyndaǵy ýchaskede aǵash kesý jumystary qaıta jandandy. Ákimdik bul jumystardyń ruqsat etilgenin jáne jobamen qarastyrylǵanyn málimdedi, dep habarlaıdy infohub.kz.
Almaty ákimdigi Egizbaeva kóshesindegi aǵash kesýge qatysty túsinikteme berdi. Jumystar Almaty qalasy Ekologıa jáne qorshaǵan orta basqarmasy bergen ruqsat negizinde júrgizilip jatqany atap ótildi.
«Aǵash kesý Egizbaeva kóshesindegi jańa jalpy bilim beretin mektepke kireberis jol salý jobasyn iske asyrý aıasynda zańdy negizde júrgizilýde», — delingen habarlamada.
Buǵan deıin ýchaskeniń bir bóliginde jumystar ýaqytsha toqtatylǵan bolatyn. Sebep — jobany iske asyrý úshin qajetti jer ýchaskelerin satyp alý rásimi.
Aıta keteıik, barlyq qajetti rásimder aıaqtalǵan soń aǵash kesý qaıta jandandy. Jumystar bekitilgen jobalyq qujattamaǵa sáıkes jalǵasýda.
«Aǵash kesý tek qurylys jobasynda kózdelgen aýmaq sheginde ǵana júzege asyrylatynyn atap ótemiz», — delingen habarlamada.
Ákimdik árbir kesilgen aǵash úshin ótemdik otyrǵyzý qarastyrylǵanyn atap ótti. Jańa kógaldandyrý jumystary júrgizilgennen keıin olarǵa úsh jyl boıy kútim jasalýy tıis.
«Qoldanystaǵy erejelerge sáıkes, árbir kesilgen aǵash úshin mindetti ótemdik otyrǵyzý jáne keıinnen úsh jyl boıy kógaldandyrýǵa kútim jasaý qarastyrylǵan», — dep túıindedi ákimdik.