2026 jylǵy 14 tamyzda bolǵan iri blekaýttan keıin Almaty qalasynyń komýnaldyq qyzmetteri kúsheıtilgen rejımde jumys istep jatyr, dep habarlaıdy infohub.kz.
Qala ákimdiginiń málimetinshe, energojúıedegi qýat balansynyń avarıalyq buzylýyna baılanysty syrtqy elektrmen jabdyqtaý ýaqytsha toqtatylǵan. Barlyq qyzmetter qalanyń tirshiligin qamtamasyz etý úshin qajetti sharalardy qabyldaýda.
Elektr qýatynyń bolmaýyna baılanysty metropolıten jumysy ýaqytsha toqtatyldy. Stansıalar kontaktili relske kerneý berý qalpyna kelgenge deıin kirýge jáne shyǵýǵa jabyq. Qozǵalystyń qaıta jandanýy týraly qosymsha habarlanady.
Medısınalyq uıymdar úzdiksiz jumys josparlaryna sáıkes jumysyn jalǵastyrýda. Stasıonarlar rezervtik qýat kózderimen — dızeldik generatorlarmen jáne úzdiksiz qorektendirý kózderimen jabdyqtalǵan. Eń aldymen reanımasıa, operasıalyq bólimsheler, qabyldaý bólimsheleri jáne basqa da mańyzdy jabdyqtar rezervtik qýatpen qamtamasyz etiledi. Jedel medısınalyq kómek belgilengen tártipte kórsetilýde.
Keıbir aýdandarda sý qysymynyń ýaqytsha tómendeýi jáne sýmen jabdyqtaýda úzilister bolýy múmkin, ásirese ǵımarattardyń joǵarǵy qabattarynda. Bul elektr qýatymen jumys isteıtin sorǵy stansıalarynyń toqtaýyna baılanysty. Elektr qýaty qalpyna keltirilgennen keıin sorǵy stansıalary iske qosylyp, sýmen jabdyqtaý birtindep qalpyna keledi.
Ákimdik qalalyq qyzmettermen birlesip jaǵdaıdy baqylaýdy jalǵastyrýda jáne tirshilikti qamtamasyz etý obektileriniń turaqty jumysy úshin barlyq sharalardy qabyldaýda. Ári qaraıǵy ózgerister týraly qosymsha habarlanady. Turǵyndardy sabyrlyq saqtaýǵa jáne tek resmı aqparat kózderine senýge shaqyrady.
Eske salaıyq, búgin Almatyda jáne Almaty oblysynda iri blekaýt boldy. Energetıka mınıstrliginiń derekteri boıynsha, sebebi Ortalyq Azıa energojúıesi tarapynan elektr energıasy aǵynynyń kúrt ózgerýinen týyndaǵan energojúıedegi qýattyń artýy boldy. Qarsy avarıalyq avtomatıka iske qosylyp, Qazaqstannyń keıbir óńirlerinde birqatar tutynýshylardyń óshirilýine ákeldi.