Almatynyń Alataý aýdanyndaǵy iri «Aqkent-3» turǵyn úı kesheniniń toǵyz kópqabatty úıiniń turǵyndary qala ákimdigine kómek surap júgindi. Olardyń aıtýynsha, úılerdiń qasbeti qaýipti jaǵdaıda tur, dep habarlaıdy infohub.kz saıty.
e-Petition portalynda «Aqkent-3» turǵyn úı kesheniniń №45, 46, 47, 48, 50, 51, 52, 53 jáne 54 úıleriniń turǵyndary petısıa jarıalady. Olardyń málimdeýinshe, kóppáterli turǵyn úılerdiń qasbeti «qanaǵattanarlyqsyz ári yqtımal qaýipti jaǵdaıda».
«Keıbir ýchaskelerde qaptama plıtalary qabyrshaqtanyp, qulap jatyr. Bul turǵyndardyń, sonyń ishinde balalardyń ómiri men densaýlyǵyna naqty qaýip tóndiredi», — dep jazady ótinish avtorlary.
Turǵyndardyń aıtýynsha, atalǵan úılerdegi páterlerdiń edáýir bóligi memlekettik jáne komýnaldyq turǵyn úı qoryna jatady, al keıbir úılerde memlekettik turǵyn úıdiń úlesi shamamen 70%-dy quraıdy.
Petısıada Almaty qalasynyń ákimdiginen toǵyz úıdiń de qasbetine tehnıkalyq tekserý júrgizýdi jáne jergilikti búdjet qarajaty esebinen keshendi kúrdeli jóndeý, rekonstrýksıalaý nemese jańartý múmkindigin qarastyrýdy suraıdy. Bul «Halyqtyń qatysýymen qalyptasatyn búdjet» tetigi, biryńǵaı sáýlet kelbetin qalyptastyrý baǵdarlamasy nemese zańnamada kózdelgen ózge de búdjettik tetik arqyly júzege asýy tıis.
«Osy máseleni tek jeke menshik ıelerine nesıe arqyly sheshýge júktemeı, atalǵan úılerdegi úı-jaılardyń iri menshik ıesi retinde memlekettiń de qatysýyn eskerýdi suraımyz. Eń aldymen azamattardyń qaýipsizdigi jáne yqtımal jazataıym oqıǵalardyń aldyn alý qajettiligi týraly sóz bolyp otyr», — delingen petısıada.