Qala kúnine oraı 19–20 qyrkúıekte Almatyǵa 200 tonnadan astam alma jetkiziledi. Fermerlik sharýashylyqtar Panfılov pen Qazybek bı kósheleriniń qıylysynda ashylatyn jármeńkede ártúrli suryptaǵy ónimderin usynady, dep habarlaıdy infohub.kz saıty.
Mundaı kólemdegi jemis megapolıstiń ortalyǵyn bir-eki kúnge úlken alma jármeńkesine aınaldyrýǵa jetedi. Ol bıyl 16-shy ret ótetin Alma Qala jyl saıynǵy festıvali aıasynda uıymdastyrylady, dep habarlady festıváldiń baspasóz qyzmeti.
Kezdesýdiń basty alańy Panfılov pen Qazybek bı kósheleriniń qıylysy bolady. Munda fermerlik sharýashylyqtar ádettegi klasıkalyq suryptardan bastap, áıgili almatylyq aportqa deıingi sırek kezdesetin túrlerin ákeledi. Qonaqtar almany satyp qana qoımaı, olardy bir-birimen salystyryp, Almaty aglomerasıasyndaǵy túrli sharýashylyqtarda ósirilgen jemistiń túsi, hosh ıisi, tyǵyzdyǵy men dámi qanshalyqty erekshelenetinin baǵalaı alady.
Alma Qala baǵdarlamasy eki kúnge arnalǵan jáne 10 taqyryptyq alańǵa bólingen. Ulttyq aımaqta fólklorlyq ujymdar, etnıkalyq аnsámblder men kúı oryndaýshylary óner kórsetedi. Teatr sahnasynda almatylyq teatrlardyń qoıylymdary kórsetilip, balalar spektáklderi men oqýlary ótedi.
Balalarǵa anımatorlar, oıyndar men shyǵarmashylyq sheberlik sabaqtary bar jeke keńistik uıymdastyrylady. Qolónershiler aımaǵynda 50-den astam óndirýshi men shyǵarmashylyq kásipker óz jumystaryn usynady, al kelýshiler oıý, toqý, sýret salý, músindeý jáne áshekeı jasaýdy ózderi baıqap kóre alady.
Gastronomıalyq bólikke jergilikti óndirýshiler jaýap beredi: Alma Qala-da djem, tosap, pastıla, keptirilgen jemister, alma chıpsy, bal, qurt jáne basqa da jergilikti ónimderdi dámin tatyp, satyp alýǵa bolady.
Qala týraly jańa nárse bilgisi keletinderge de oryn tabylady. Digital-aımaqta Almatynyń sıfrlyq murajaıy qurylyp, megapolıstiń tehnologıalarmen birge qalaı ózgerip jatqany kórsetiledi.
Eko-aımaqta kelýshilerge qaldyqtardy bólek jınaý men qaıta óńdeý, sondaı-aq «Taza Qazaqstan» baǵdarlamasy aıasyndaǵy qalalyq ekologıalyq bastamalar týraly aıtylady. Qasynda onnan astam volonterlik uıym qatysatyn volonterler stansıasy jumys isteıdi.
Alma Qala qonaqtary úshin bıznes ókilderi arnaıy ınteraktıvti alańdar daıyndap jatyr. Festıváldiń mýzykalyq bóligi de kem emes. Máselen, 19 qyrkúıekte sahnalardyń birinde Alı Okapov, Madı Rymbaev, Nurǵalym Amanbaı, Nurmuhammed Jaqyp, Aqerke Amalát, Kárim Mutyrǵanov, Jas-Muqasan jáne ILIGAI óner kórsetedi.
20 qyrkúıekte baǵdarlamany Sanat Asýat, Dana Maksımova, DARO, Nuraıym Gımran, Arýjan Bekbolat, KHAZAR, Mırjan Jıdebaı jáne basqa da ártister jalǵastyrady.
Eske salaıyq, Almatynyń qala kúni 19 jáne 20 qyrkúıekte atap ótiledi. Barlyǵy qalada 300-ge jýyq merekelik is-shara josparlanǵan. Negizgi qalalyq alańdarǵa kirý tegin.