Almaty turǵyndary «Atakent» saıabaǵyndaǵy aǵashtardyń kúıine alańdaýshylyq bildirip, áleýmettik jelilerde sarǵaıyp bara jatqan kóshetterdiń beınejazbasyn jarıalady. Qala turǵyndary bılikti shara qoldanýǵa shaqyrady, dep habarlaıdy infohub.kz saıty.
aitenqyzy degen atpen tirkelgen qoldanýshy Threads áleýmettik jelisinde saıabaq aýmaǵyndaǵy jasyl jelekterdiń kúıip jatqanyn kórsetetin kadrlardy jarıalady. «Bizdiń „Atakent“ kúıip jatyr, qalalyq saıabaǵymyzdyń qýrap jatqanyn kórý óte qynjyltady. Shara qoldanyp, aǵashtarymyzdyń ólýine jol bermeýlerińizdi suraımyn», — dep jazdy ol.
Máselege qalanyń basqa da turǵyndary qosyldy. Pikirlerde olar jaz basynda ákimdik pen «Zelenstroıǵa» júgingenderin, biraq eshqandaı jaýap bolmaǵanyn aıtady. «Jaz basynda ákimdikke de, „Zelenstroıǵa“ da jazdym, „qadaǵalaımyz“ dep jaýap berdi, biraq nátıje qaıda?»; «Men de ótken jyldan beri „Atakenttiń“ joǵarǵy jaǵynda ne bolyp jatqanyn jazǵym keldi. Nege aǵashtar men qaraǵaılar sýarylmaıdy?»; «Bálkim, bul ınfeksıa nemese zıankester shyǵar. Ókinishke qaraı, búkil qalada aǵashtarǵa qatysty jaǵdaı máz emes», — dep bólisedi qala turǵyndary.
Bostandyq aýdany ákimdigi ahýalǵa túsinikteme berdi. Onda saıabaq aýmaǵynda stasıonarlyq sýarý júıesi joq ekenin, sondyqtan kóshetterge kútim motopompalardyń kómegimen sý jiberý ádisimen júzege asyrylatynyn túsindirdi. «Jasyl jelekterge tıisti kútimdi qamtamasyz etý maqsatynda qazirgi ýaqytta sýarý mehanıkalandyrylǵan tásilmen kúsheıtildi. Túngi ýaqytta saıabaq aýmaǵyn sýarý úshin qosymsha 5 birlik sýarý tehnıkasy jumyldyryldy. Ahýal baqylaýda, sýarý jumystary kúsheıtilgen rejımde júrgizilýde», — dep sendirdi ákimdikte.