Almaty turǵyndary qoǵamdyq kólik jumysyndaǵy aqaýlar týraly kóptep habarlaýda. Olardyń aıtýynsha, marshrýttarǵa birli-jarym avtobýs shyǵyp, basym bóligi gaz quıý stansıalarynda tur. Buǵan qaladaǵy birneshe gaz beketindegi tehnıkalyq aqaý sebep bolǵan, dep habarlaıdy infohub.kz.
29 shilde kúni tańerteń áleýmettik jeli qoldanýshylary Jarokov kóshesinde avtobýstardyń avtomobıl gaz quıý stansıasyna (AGQS) kezekke turyp, uzyn kolonna qurǵanyn jazdy. Kýágerlerdiń aıtýynsha, qoǵamdyq kólik bir jolaqty túgel alyp qalǵan. Jaıaý júrginshiler joly jóndelip jatqandyqtan, joldyń bir bóligi jabyq, bul jaǵdaıdy odan ári ýshyqtyrdy.
Onnan astam avtobýstan turatyn mundaı kolonnalar Raıymbek dańǵylynda da baıqaldy. Qoldanýshylar avtobýsty 30–40 mınýt kútýge májbúr bolǵandaryn aıtady. Keıbireýler muny gaz tapshylyǵymen, endi bireýler jol jóndeý jumystary men keptelispen baılanystyrady.
Keıin Kazakhstan Bus Community qaýymdastyǵy aqaýlardyń sebebi Almatydaǵy birneshe avtomobıl gaz toltyrý kompresorlyq stansıasyndaǵy (AGTKS) tehnıkalyq isten shyǵý bolǵanyn málimdedi. «Qaladaǵy kóptegen gaz marshrýttarynda jyljymaly quramnyń josparly shyǵarylymy aıtarlyqtaı tómendedi. Jekelegen baǵyttarda marshrýtqa tórtten segizge deıin avtobýs qaldy. Kólik qozǵalysynyń aralyǵy ýaqytsha ulǵaıtyldy», — delingen habarlamada.
Kazakhstan Bus Community mamandar aqaýdy joıýǵa kirisip, avtobýstardyń ádettegi kestege oralatynyn qosty.