Almatynyń Bostandyq aýdanynda qaıǵyly oqıǵa boldy: qoǵamdyq kólik dóńgeleginiń astynda jas áıel qaza tapty. Apatqa deıingi sońǵy sátterdi beınelegen beınebaqylaý kameralarynyń jazbalaryn qalalyq polısıa departamenti jarıa etti, dep habarlaıdy infohub.kz.
Quqyq qorǵaý organdarynyń málimetinshe, oqıǵa Mustafın kóshesinde bolǵan. Avtobýs ońtústik baǵytta kele jatyp, rettelmeıtin jaıaý júrginshiler ótkelinde 30 jastaǵy áıel paıda bolǵan.
Jarıalanǵan kadrlarda jaıaý júrginshiniń «zebraǵa» aıaq basqany, al oǵan qarama-qarsy avtobýstyń kele jatqany kórinedi. Júrgizýshi reaksıa jasap, tejeýge úlgermegen, sonyń saldarynan soqtyǵys bolǵan. Alǵan jaraqattary ómirmen syıyspaıtyn bolyp shyqty: zardap shekken áıel dárigerler kelgenge deıin oqıǵa ornynda qaıtys boldy.
Oqıǵa ornyna patrúldik polısıa qyzmetkerleri men tergeý-jedel toby jedel jetti. Ólimmen aıaqtalǵan jol-kólik oqıǵasy boıynsha sotqa deıingi tergeý bastaldy.
«Polısıa qyzmetkerleri bolǵan oqıǵanyń barlyq mán-jaıyn anyqtaýǵa dereý kiristi. JKO faktisi boıynsha qylmystyq is qozǵaldy. Qazirgi ýaqytta tergeý apattyń sebepteri men mán-jaılaryn anyqtap jatyr», — dep túsindirdi Almaty polısıa departamentiniń baspasóz qyzmeti.
Qylmystyq is aıasynda júrgizýshiniń áreketine quqyqtyq baǵa berýge jáne bolǵan oqıǵanyń naqty sebepterin anyqtaýǵa múmkindik beretin qajetti saraptamalar kesheni taǵaıyndaldy.