Almatyda avtobýs júrgizýshisi jol qozǵalysy erejesin buzyp, basqa júrgizýshige ádepsiz ym jasaǵany úshin jaýapkershilikke tartyldy. Bul týraly infohub.kz saıty habarlaıdy.
Threads áleýmettik jelisindegi Almaty.official akkaýntynda almatylyq turǵynnyń avtobýs júrgizýshisiniń ádepsiz minez-qulqyna shaǵymdanǵan vıdeo jarıalandy. Avtordyń aıtýynsha, júrgizýshi ony qıyp ótip, eskertý jasaǵanda keshirim suraýdyń ornyna ortańǵy saýsaǵyn kórsetken.
Jarıalanymda: "Almatylyq avtobýs júrgizýshileriniń jolda ózin qalaı ustaıtynynyń aıqyn mysalyn kórsetti. Avtordyń aıtýynsha, júrgizýshi ony qıyp ótip, eskertýden keıin keshirim suramaı, ádepsiz ym jasaǵan. Post avtory jaǵdaıǵa ázilmen qaraǵanymen, júrgizý mádenıetin eshkim joımaǵanyn atap ótti", - delingen.
Almaty polısıa departamenti jarıalanymǵa túsinikteme berdi. Áleýmettik jelilerdi monıtorıńteý barysynda marshrýttyq avtobýs júrgizýshisiniń jol qozǵalysy erejesin buzǵany kórsetilgen vıdeo anyqtaldy. Tekserý nátıjesinde júrgizýshiniń jeke basy anyqtaldy. 1970 jyly týǵan júrgizýshige qatysty ákimshilik shara qoldanyldy. Sondaı-aq onymen bolashaqta mundaı buzýshylyqtarǵa jol bermeý týraly profılaktıkalyq áńgime júrgizildi.