Almatyda belgisiz er adamnyń balaǵa shabýyl jasaǵany týraly habarlamadan keıin polısıa tergeý bastady. Oqıǵa «Atakent» saıabaǵynyń mańynda bolǵan. Qorǵanys mınıstrliginiń málimetinshe, qaýipti saldardyń aldyn alýǵa jaqyn jerde bolǵan áskerı qyzmetshiler kómektesken, dep habarlaıdy infohub.kz saıty.
Keıin Threads áleýmettik jelisinde zardap shekken balanyń anasy ekenin aıtqan áıel oqıǵanyń mán-jaıyn ashyp aıtty. Onyń aıtýynsha, belgisiz adam jattyǵýda bolǵan balalarǵa shabýyl jasaǵan. «Ol qazaqtardy jek kóretinin aıǵaılap, balalardy pyshaqtap tastaımyn dep qorqytqan. Aldymen bir qyzdy urýǵa tyrysqan, biraq ol úlgerip qashyp ketken. Sosyn meniń 10 jasar ulymnyń kózine judyryqpen urǵan. Balanyń kóziniń asty kógerip qaldy. Balalar qorqyp, qashyp úlgerdi», — dep jazdy ol.
Áıel sol sátte jaqyn jerde áskerı qyzmetshiler bolǵanyn rastady. Olar kúdiktini qýyp jetip, ustap, 102-ge habarlasyp, polısıa qyzmetkerlerine tapsyrǵan. «Búgin meniń balam zardap shekti. Erteń onyń ornynda kez kelgen basqa bala bolýy múmkin. Baqytymyzǵa oraı, balalar qashyp úlgerdi. Munyń qalaı aıaqtalýy múmkin edi dep oılaý da qorqynyshty», — dep qosty ol.
NUR.KZ tilshisine Almaty polısıa departamentiniń baspasóz qyzmeti kúdiktiniń ustalyp, polısıaǵa jetkizilgenin rastady. «Saıabaq aýmaǵynda kámeletke tolmaǵanǵa qatysty kúsh qoldaný faktisi boıynsha Bostandyq aýdandyq polısıa basqarmasy tergeý júrgizip jatyr. Qazaqstan Respýblıkasynyń zańnamasyna sáıkes mindetti túrde quqyqtyq baǵa berilip, prosesýaldyq sheshim qabyldanady», — dep habarlady polısıada.
Qazirgi ýaqytta polısıa oqıǵanyń mán-jaıyn anyqtap jatyr.