Úkimet otyrysynda premer-mınıstr Oljas Bektenov energetıka mınıstrine 14 tamyzda Almatyda bolǵan jappaı elektr qýatynyń óshirilýine qatysty tekserý nátıjeleri týraly suraq qoıdy, dep habarlaıdy infohub.kz.
Energetıka mınıstri Erlan Aqkenjenovtiń málimdeýinshe, elimizdiń ońtústik óńirlerindegi elektr energıasy tapshylyǵyn eskere otyryp, mınıstrlik Almatydaǵy JEO-2 jáne JEO-3, sondaı-aq Túrkistan oblysyndaǵy qýaty 1000 megavatt jańa bý-gaz qondyrǵysyn qosa alǵanda, jańa generasıa obektilerin iske qosýdy aıaqtap jatyr. Sonymen qatar, elektr jelileri nyǵaıtylýda: ońtústik energıa júıesiniń senimdiligin arttyrý úshin Shý-Jambyl-Shymkent 500 kılovolttik jelisi salynýda.
Bektenov bul strategıalyq mańyzdy baǵyt ekenin atap ótip, osy jumysty jandandyrý qajettigin aıtty.
Eske salaıyq, 14 tamyzda Almaty men Almaty oblysynda aýqymdy blekaýt boldy. Energetıka mınıstrligi baspasóz qyzmetiniń málimetinshe, onyń sebebi — Ortalyq Azıa energıa júıesi tarapynan elektr energıasy aǵynynyń kúrt ózgerýinen týyndaǵan qýattyń artýy. Sonyń saldarynan avarıaǵa qarsy avtomatty júıe iske qosylyp, Qazaqstannyń keıbir óńirlerinde birqatar tutynýshylar elektr qýatynan ajyratyldy.
Almatyda baǵdarshamdar óship, joldarda keptelis paıda bolyp, qala turǵyndary ózderi qozǵalysty retteýge shyqty. Sondaı-aq, syrtqy elektrmen jabdyqtaý tolyq toqtaǵandyqtan, metro ýaqytsha jumysyn toqtatty, al «Shymbulaq» kýrortynyń kelýshileri kanat jolynyń kabınalarynda qalyp qoıdy.
Keıinirek KEGOC kompanıasy elektr qýatynyń óshirilýi Qazaqstannyń segiz óńirinde baıqalǵanyn habarlady.