Almatyda №7 qalalyq klınıkalyq aýrýhananyń dárigerleri toǵyzynshy qabattan qulap, aýyr jaraqat alǵan 34 jastaǵy áıeldi ómirge qaıtardy. Naýqasty mýltıdısıplınarlyq mamandar tobynyń úılesimdi áreketiniń arqasynda óte aýyr jaǵdaıdan alyp shyǵý múmkin boldy. Ony onynshy kúni ońaltý sharalarymen ambýlatorıalyq emge shyǵardy, dep habarlaıdy infohub.kz saıty.
Almaty qoǵamdyq densaýlyq saqtaý basqarmasynyń málimetinshe, áıel aýyr aralas jaraqatpen aýrýhanaǵa shuǵyl túrde jetkizilgen. Dárigerler mı-bas súıek jaraqatyn, keýde qýysynyń aýyr jaraqatyn, qabyrǵalardyń kóptegen synýyn, pnevmotoraks pen gemotoraksty, sondaı-aq jambas súıekteriniń, ortan jilikterdiń jáne toqpan jiliktiń synýyn anyqtady. Naýqastyń jaǵdaıy óte aýyr dep baǵalandy: koma jáne ólim qaýpi joǵary travmatıkalyq shok. Jedel járdem kóliginde-aq brıgada ıntýbasıa jasap, shokqa qarsy terapıany bastady. Stasıonarǵa túskennen keıin birneshe mınýt ishinde pasıentke qabyldaý bóliminde barlyq qajetti shuǵyl kómek kórsetildi.
Almaty №7 qalalyq klınıkalyq aýrýhanasynyń dırektory Nurdos Qadyrbekovtiń aıtýynsha, emdeýge birneshe baǵyttaǵy mamandar qatysty. «Emdeýge anestezıolog-reanımatologtar, travmatologtar, neırohırýrgter, hırýrgter, terapevter, kardıologtar, psıhologtar men psıhıatrlar qatysty. Pasıentke barlyq medısınalyq kómek MÁMS júıesi aıasynda kórsetildi», — dedi Nurdos Qadyrbekov.
№7 qalalyq klınıkalyq aýrýhanasynyń polıtravma bólimshesiniń meńgerýshisi Ramazan Askerov áıelge birneshe operasıa jasalǵanyn atap ótti: aıaq-qoldaryna, al eki kúnnen keıin jambas súıekterine. «Barlyq kezeńderde tromboembolıa jáne maıly embolıa sıaqty asqyný qaýpi óte joǵary boldy. Degenmen, pánaralyq tásildiń, komandalyq jumystyń jáne durys emdeý taktıkasynyń arqasynda oń nátıjege qol jetkize aldyq», — dedi dáriger. Jetinshi kúni naýqas aıaǵynan turǵyzyldy, al onynshy kúni qanaǵattanarlyq jaǵdaıda úıine shyǵaryldy.