Almatyda balaǵa shabýyldyń aldyn alyndy: janynda bolǵan áskerı qyzmetshiler jaǵdaıǵa aralasyp, zıankesti ustady, dep habarlaıdy infohub.kz saıty.
Qorǵanys mınıstrliginiń málimetinshe, oqıǵa búgin, 5 tamyzda, saǵat 08:00 shamasynda bolǵan. Bitimgershilik operasıalar ortalyǵynyń tórt áskerı qyzmetshisi «Atakent» saıabaǵy mańyndaǵy baǵytta kele jatyp, kámeletke tolmaǵan balaǵa qatysty quqyqqa qaıshy árekettiń kýási bolǵan.
«Belgisiz er adam kenetten balaǵa shabýyl jasap, onyń betine judyryqpen soqqy bergen. Bir sekýnd joǵaltpaı, áskerı qyzmetshiler jaǵdaıdy tez baǵalap, quqyqqa qaıshy áreketti toqtatyp, kúdiktini zalalsyzdandyryp, polısıa qyzmetkerleri kelgenge deıin ustap turdy», — dedi vedomstvoda.
Quqyq qorǵaý organdary kelgennen keıin ustalǵan adam odan ári tergeý úshin polısıa qyzmetkerlerine tapsyryldy.
Balanyń otbasy qaýipti jaǵdaıdyń aldyn alǵan ofıserlerge alǵysyn bildirdi. Ótinishte, atap aıtqanda: «Eresek er adam agresıa tanytyp, kámeletke tolmaǵan ulymyzdy urǵan kezde, janynda basqa da balalar boldy. Olardyń bári qatty qoryqty. Baqytymyzǵa oraı, janynda áskerı qyzmetshiler boldy, olar ótip ketpedi. Olar dereý aralasyp, er adamdy ustady, polısıany shaqyrdy jáne ony quqyq qorǵaý organdaryna tapsyrdy. Shyn júrekten podpolkovnık Batyr Týıakovqa, maıor Medet Mahmetovke, kapıtan Danıar Baımýldınge jáne kapıtan Ásem Abdraımovaǵa batyldyqtary, janashyrlyqtary jáne kómekke daıyndyqtary úshin alǵys bildiremiz. Olardyń batyl áreketteriniń arqasynda balalar qaýipsiz boldy», — delingen.
NUR.KZ tilshisi Almaty qalalyq polısıa departamentine túsinikteme surap habarlasqanymen, jarıalaý kezinde jaýap kelmedi.