Almaty qalalyq mádenıet basqarmasy basshysynyń burynǵy orynbasary Naılá Mýlúkova búdjet qarajatyn iri kólemde jymqyrǵany úshin sottalǵan edi. Ol qamaýdan bosatyldy. Sot oǵan jazanyń ótelmegen bóligin bas bostandyǵyn shekteýmen almastyrdy, dep habarlaıdy infohub.kz.
QR İİM Qylmystyq-atqarý júıesi komıtetiniń málimetinshe, Mýlúkova bosatylǵannan keıin probasıa qyzmetiniń esebine qoıyldy. Ol Qazaqstan aýmaǵynan tys jerge shyǵýǵa tyıym salýdy qosa alǵanda, barlyq shekteýlerdi saqtaýǵa mindetti. Probasıa qyzmetiniń qyzmetkerleri sot belgilegen shekteýlerdiń saqtalýyn turaqty baqylap, júıeli túrde tekserý júrgizedi.
Eske salaıyq, 2023 jyly Mýlúkova sybaılas jemqorlyqqa qatysty tergeýge ilikken edi. Tergeý nusqasy boıynsha, ol «Bezendirý KZ» JSHS-ne basymdyq berip, seriktestik 456 mln teńgege segiz memlekettik kelisimshart alǵan. Aıyptaý tarapy búdjet qarajatynyń bir bóligi jalǵan kelisimsharttar men qyzmet qunyn asyra kórsetý arqyly shyǵarylǵanyn, memleketke keltirilgen zalal 92,8 mln teńgeni quraǵanyn málimdedi. Nátıjesinde burynǵy sheneýnik qarajatty jymqyrý, laýazymdyq ókilettikterdi teris paıdalaný jáne kásipkerlik qyzmetke zańsyz qatysý faktileri boıynsha kináli dep tanyldy.